Máis de 30 empresas traballan xuntas pola dinamización turística no III Workshop do Xeodestino Ría de Vigo e Baixo Miño
• As instalacións da cervexeira Trisk-Ale, no Porto do Molle de Nigrán, acolleron un novo encontro para fomentar sinerxías coas que crear novos produtos turísticos que promocionen o territorio como destino
Infogauda / Nigrán
“No Xeodestino Ría de Vigo e Baixo Miño entendemos
que a unión fai a forza. Por iso para nós a palabra clave é a cooperación e
sabemos que en turismo debemos ir da man e colaborar para ser máis eficientes e
efectivos nas nosas promocións, aproveitando fortalezas e minimizando
debilidades”. Así explicaba o representante institucional do Xeodestino e
alcalde de Nigrán, Juan A. González, a finalidade dos talleres de traballo postos en
marcha pola Ría de Vigo e Baixo Miño, que este luns celebraba a súa terceira
edición nas instalacións da cervexeira Trisk-Ale, no Porto do Molle.
Unha cita que volveu congregar a máis de 30
empresas de diferentes sectores dos 14 concellos do xeodestino (A Guarda,
Baiona, Fornelos de Montes, Gondomar, Mos, Nigrán, O Porriño, O Rosal, Oia,
Pazos de Borbén, Redondela, Soutomaior, Tomiño e Tui) e doutros puntos da
provincia para facilitar unha primeira toma de contacto entre entidades e
favorecer a creación de sinerxías de presente e de futuro que dean lugar a
novos produtos turísticos que promocionen o territorio como destino. “Queremos
axudar a poñer en marcha iniciativas de calidade, innovadoras, seguras e
sostibles que incidan no compoñente experimental para achegar un plus de valor
ás persoas que nos visitan. E para acadar este fin temos que por en mans das
empresas as ferramentas necesarias que lles permitan crear e comercializar
produtos e servizos baseados nos nosos recursos, como poden ser estes encontros”,
salientou González.
Unha aposta por poñer en contacto ás empresas que
quixo gabar a deputada de Turismo da Deputación de Pontevedra, Ana Laura
Iglesias, que resaltou o importante músculo turístico do territorio e da
provincia. “Temos que poñer en valor ás nosas e nosos produtores, porque sen
eles o sector turístico nin existiría nin tería razón de ser. Só así poderemos
seguir avanzando e seguir facendo da provincia un referente en turismo de
calidade para toda España”, recalcou.
Pola súa banda o xefe da área provincial de
Pontevedra de Turismo de Galicia, Felipe Ferrero, resaltou que “workshops como
o que estamos a celebrar hoxe son unha iniciativa fundamental para que todos os
sectores se comuniquen e complementen para potenciar o turismo no territorio”.
González quixo recalcar que “queremos que o
Xeodestino axude a por en marcha iniciativas de calidade, innovadoras, seguras
e sostibles, que incidan no compoñente experimental para achegar un plus de
valor ás persoas que nos visitan. E para acadar este fin temos que por na man
das empresas as ferramentas necesarias que lles permitan crear e comercializar
produtos e servizos baseados nos nosos recursos, como poden ser actividades
como o workshop que estamos a desenvolver”.
Un aspecto que tamén quixo salientar a alcaldesa
de Redondela, Digna Rivas, que salientou a importancia que ten o Camiño de
Santiago para o sector turístico no concello que gabou a realización “destes
encontros entre entidades de diferentes sectores que son un xeito de poder
coñecervos entre vós e de dar máis pulo ás vosas empresas. Estou convencida de
que será un éxito tan grande como a primeira edición celebrada hai un ano en
Tui”.
Pola súa banda, Felipe Ferrero, xefe da área
provincial de Pontevedra de Turismo de Galicia, destacou o papel que xoga o
Xeodestino Ría de Vigo e Baixo Miño no desenvolvemento de este tipo de
encontros “para que o territorio teña unha presenza propio con todo o que as e
os visitantes precisan e demandan”. “Estas reunións son vitais non solo no eido
turístico, senón tamén en todos os sectores, porque creando redes podemos facer
que as persoas que nos visitan marchen coa sensación de ter vivido unhas boas
vacacións e recibido un bo servizo”, asegurou.
Nesta ocasión, tras a recepción institucional, as
empresas participantes puideron coñecer dous novos casos de éxito e boas
prácticas no eido turístico. Así, Nacho Crespo, da Quinta de San Amaro, en
Meaño, contou a historia deste hotel e restaurante con encanto que chegou a
montar neste recuncho de Galicia tras vender a súa empresa e a súa casa en
Madrid. Xa con 15 anos de vida, Crespo resaltou o éxito que a quinta tivo dende
un principio, “o que fai que ás veces te asustes e cometas moitos erros”. “Pero
fomos quen de adaptarnos á realidade e ás circunstancias, a reinventarnos coa
crise do 2012 mirando cara ao estranxeiro e potenciando a nosa
internacionalización, algo que fixo que aínda hoxe en día o 60% da nosa
clientela sexa de fóra de España”, explicou ás e aos asistentes. Para Crespo “o
reto do turismo é manterse con constancia, intentando levar unha liña moi
persoal, cun criterio propio que che permita ata equivocarte”. Destacou tamén a
integración na comunidade da vila e a aposta polos provedores locais. “Estar
onde estamos fixo que sexamos un produto máis auténtico e sostible”, aseverou.
Pola súa parte, Pablo Mariño contou o nacemento e
evolución de Bluscus, a primeira axencia de viaxes especializada en turismo
mariñeiro de Galicia, agora xa convertido en operador turístico. “Criamos que a
nosa comunidade tiña moito potencial en todo o relacionado co mar e cos nosos
ríos, por iso apostamos por facer vivir á nosa clientela experiencias distintas
vinculadas aos produtos e produtores locais. Queriamos vivir o mar coa xente do
mar”, explicou durante o encontro.
Como é habitual nestes encontros, tras as presentacións leváronse a cabo unha serie de reunións rápidas coas que establecer os primeiros contactos comerciais con outras empresas dentro dun evento dinámico e áxil co que fomentar colaboracións e sinerxías. Para rematar deuse paso a unha degustación de produtos do territorio que contou coa especial colaboración da propia Trisk-Ale e das empresas locais Calabizo e ChupiPostres.
.jpg)
Ningún comentario:
Publicar un comentario