PONTEVEDRA

O PP pide á Deputación de Pontevedra que medie co Goberno central para esixir o mantemento das liñas de autobús estatais 

• Cubela sinala que o Goberno provincial “non pode nin debe mirar cara outro lado. Dunha vez por todas debe por a institución e os concellos por riba de intereses políticos, e plantarse”. 

Jorge Cubela López, voceiro do grupo provincial do Partido Popular

Foto: D.PO.

 

Infogauda / Pontevedra 

 O grupo provincial do Partido Popular “reclama ao Goberno bipartito da Deputación de Pontevedra que medie e esixa ao Goberno de Pedro Sánchez que rectifique e manteña as liñas de autobús estatais na provincia.” Sinalan que o novo mapa concesional que acaba de presentar o Goberno central “é un auténtico despropósito”, xa que contempla “unha eliminación drástica” de paradas nos percorridos nacionais, que na provincia de Pontevedra afecta a Silleda, Lalín, Forcarei, O Porriño e Tui, suprime tráficos internos dentro de Galicia e promove transbordos nas viaxes de longa distancia que agora non se fan.  

 “Un novo ataque á provincia e a Galicia”, subliña o voceiro Jorge Cubela, que denuncia que “están condenando ao rural a unha perda radical de servizos e de conectividade en trasporte público”. Nesta liña, di que “as dificultades de mobilidade no medio rural é un hándicap máis que provoca a perda de poboación, e si o Goberno central en lugar de aumentar as liñas aposta por suprimilas, está provocando un dano irreparable”. Por iso, entende que a Deputación de Pontevedra debe liderar a defensa para manter na provincia este servizo. “Non pode nin debe mirar cara outro lado. Dunha vez por todas debe por a institución e os concellos por riba de intereses políticos, e plantarse ante o Goberno central”, reclama.   

 Os populares explican que o Goberno central pretende deixar a máis de 136.000 galegos sen parada de autobús, aludindo á pouca poboación ou á baixa demanda. “Non poden primar a planificación urbana e metropolitana e a rendibilidade económica da mobilidade para prexudicar ao rural”, engaden.   

 Ademais, este recorte súmase á Lei de mobilidade sostible, que impulsa o Goberno e que supón suprimir os trens rexionais galegos. “Pedimos que deixen de desmantelar o transporte público rural galego”.