Tomiño celebra pleno ordinario con 11 puntos na Orde do Día
Entre as cuestións a salientar figura un expediente de modificación de créditos de máis de 668.000 euros
Infogauda / Tomiño
Ás oito da tarde de hoxe, terá lugar no Salón de Plenos, sesión ordinaria
con 11 puntos na Orde do Día. Entre eles figura unha modificación de créditos
financiada con remanente líquido de tesourería para gastos xerais, por valor de
668.556,59 euros, que permitirá enfrontar diferentes proxectos e obras;
algunhas de singular importancia, como a mellora da eficiencia enerxética da
coñecida como Casa da Teonila, en Goián (140.000 euros), edificio de
arquitectura indiana situado a carón da praza de Goián que adquiriu o Concello
hai un tempo.
Outra partida moi importante é a adicada ao
acondicionamento da área de xogos infantil e xuvenil do Campo da Feira (200.000
€); obra que se levará a cabo despois da remodelación da contorna do
parque realizada nestes últimos meses co fin de integrar este espazo de lecer á
zona do Seixo. Ademais de zona de xogos infantís haberá unha pista de patinaxe, nova iluminación, etc.
Tamén están contempladas varias obras
de mellora nas parroquias co propósito de acondicionar espazos públicos e
mobiliario de zonas verdes, mellorar as canalización de augas pluviais, etc.
(165.078,70 €).
Por último, é significativa a partida
de case 90.000 euros destinada á creación de dúas áreas de servizo para autocaravanas (unha en Tomiño centro e
outra en Goián).
Así mesmo, forman parte da Orde do Día varias mocións da oposición e unha do Grupo Municipal do BNG sobre o tema do Sáhara; a sinatura dun convenio sobre a EDAR (Estación Depuradora de Augas Residuais)e unha declaración solicitada pola plataforma SOS SANIDADE PÚBLICA.
.jpeg)
Ningún comentario:
Publicar un comentario