DEPORTES

ATLETISMO

ÁLEX SIERPES PEREIRA, LOGROU O CAMPIONATO DE GALICIA DE CAMPO A TRAVÉS 2022

Na categoría Sub-16 masculina 

Informa: Sociedade Atlética do Trega 

 Na mañá do domingo 6 de febreiro o circuíto da praia de Cabío, na Pobra do Caramiñal (A Coruña), acolleu os mellores especialistas de cros federado desprazados de todos os puntos da xeografía galega para disputar os seus respectivos campionatos de menores Sub-16 e Sub-18, onde o atleta máis destacado da Sociedade Atlética do Trega (Tomiño), foi Álex Sierpes Pereira. O atleta guardés percorreu unha distancia de 2.500 m aproximadamente, e impoñendo o seu talento, rompeu as estatísticas da Federación Galega de Atletismo, onde a priori non o prognosticaban no cartel de claro favorito na proba de cadete masculino, entrando sorprendentemente en meta, en primeiro lugar, cun tempo de 8´35", crebando os comentarios do foro atlético galego. 

 Dese xeito, con desenvoltura, o atleta guardés Álex Sierpes Pereira non se engurrou no seu debut, no XV Campionato de Galicia de Campo a través, conseguindo o título de campión de Galicia 2022 na categoría sub-16 masculina.

 Quedou perfectamente acreditado que o noso plusmarquista galego e nacional de pista, non se deixa subestimar e da mostras de como florece día a día o seu estado de forma, recollendo de novo os froitos do bo traballo invernal que fixo durante os meses de pretemporada de cros, previos a esta competición, deixando alto e claro que tamén é un bo especialista no campo a través. 

 Felicidades Álex!