O ROSAL

 A Escola do Couso, última parada desta edición do programa ‘A Veciñanza Conta’  

Alcaldesa e equipo de Goberno estarán na Escola de Couso o vindeiro luns 18 (20.30 h) para dar conta dos proxectos en marcha e coñecer de primeira man as necesidades de rosaleses e rosalesas    

A alcaldesa do Rosal dirixíndose á veciñanza, nunha das xuntanzas do programa ‘A Veciñanza Conta’ 

Foto: C.O. R.

Infogauda / O Rosal

 O programa ‘A Veciñanza Conta’ chega ao seu final. O vindeiro luns 18 de outubro alcaldesa e equipo de Goberno estarán no Calvario, na Escola do Couso a partir das 20.30 horas, na derradeira reunión desta iniciativa de participación cidadá que busca percorrer os barrios para presentar aos rosaleses e rosalesas os proxectos xa en marcha e coñecer de primeira man as súas necesidades como veciños e veciñas. 

 Con este programa o Concello percorreu unha decena de barrios do Rosal para “escoitar cales son as cuestións e necesidades a priorizar na xestión dos recursos e darlle voz aos rosaleses e rosalesas para que sumen no crecemento paulatino do noso pobo. Porque temos o convencemento de que xuntas e xuntos podemos construír un Rosal mellor”, salienta a rexedora, Ánxela Fernández Callís.  

 Dende o Concello fan un balance moi positivo da rolda de reunións mantidas nesta nova edición do programa, xa que contou co respaldo e participación de boa parte da veciñanza de cada un dos barrios visitados.