22 de set. de 2021

PONTEVEDRA

A Deputación de Pontevedra pon en marcha unha plataforma de formación en liña para acceder aos contidos de SmartPeme as 24 horas dos 365 días do ano 

A plataforma, que emprega o software libre Moodle, está xa operativa. Contará con pílulas formativas continuamente actualizadas sobre novas tecnoloxías




Infogauda / Pontevedra

 A Deputación de Pontevedra acaba de poñer en marcha unha plataforma de formación en liña dirixida ás persoas autónomas, emprendedoras e empresas usuarias do programa SmartPeme. A aplicación, xa operativa, emprega o software libre Moodle, recoñecido a nivel mundial pola súa facilidade de uso, e permitirá que as persoas usuarias poidan acceder aos contidos de SmartPeme as 24 horas dos 365 días do ano.  

 O Moodle de SmartPeme, semellante ao que xa emprega a Deputación de Pontevedra para a capacitación do seu persoal, contará cunha selección de pílulas formativas que serán periodicamente renovadas e actualizadas. A nova plataforma de formación en liña está organizada nas categorías TIC, Imaxe, CPED (Centro Provincial de Economía Dixital), Impulsa (competitividade global dos negocios) e TurisTIC (turismo), as carteiras de servizos do proxecto SmartPeme, e ofertará desde vídeos explicativos ata infografías ou presentacións. A día de hoxe conta xa cunha selección de cincuenta obradoiros do programa.  

 As persoas autónomas, emprendedoras e empresas interesadas en acceder aos contidos da nova aplicación de SmartPeme deberán rexistrase a través da ligazón permanente que estará á súa disposición en https://smartpeme.depo.gal/gl/inicio. Tamén a través do formulario que se enviará co boletín informativo quincenal de SmartPeme. Unha vez recibidos os datos e realizada a inscrición as persoas interesadas recibirán unha mensaxe confirmando que foron rexistradas no sistema cun nome de usuaria/o e contrasinal de acceso. A partir deste momento, as persoas poderán xa acceder aos contidos do Moodle de SmartPeme e ampliar, en calquera lugar e momento, sen limitación de horarios e rachando con calquera barreira física ou temporal, coñecementos en materia dixital e de mellora da competitivade.  

 A institución provincial dá un paso máis na formación telemática, impulsada notablemente trala pandemia da COVID-19. Deste xeito, co novo Moodle de SmartPeme, que servirá como complemento ás actividades de capacitación que a rede seguirá realizando con carácter semanal, a Deputación de Pontevedra amplía o catálogo de ferramentas dixitais ao servizo do tecido industrial da provincia.

Ningún comentario:

Publicar un comentario