TURISMO TRANSFRONTEIRIZO

O RÍO MIÑO: UN DESTINO CON GRANDE POTENCIALIDADE POR DESENVOLVER  

· O vicedirector do AECT Río Miño, Uxío Benítez recibiu hoxe institucionalmente ás persoas participantes da ‘famtrip’ que están a coñecer os recursos do territorio miñoto

O vicedirector do AECT Río Miño, Uxío Benítez Fernández, cos operadores de viaxes especializados en turismo

Foto: D.PO.

Infogauda / O Baixo Miño   

 Os operadores de viaxes especializados en turismo que estes días están a coñecer o territorio do Miño están a descubrir un destino cunha grande potencialidade  por desenvolver. Así o deixaron ver na recepción institucional que contou co vicedirector do AECT Río Miño, Uxío Benítez Fernández. 

Os operadores de viaxes especializados en turismo xunto a ponte vella entre Valença do Minho e Tui

 Na xornada de hoxe o seu percorrido polo territorio comezou en Valença do Minho, onde a ponte internacional, para despois pasar a Tui, facer rafting en Arbo, comer na adega Señorío de Rubiós, gozar das ecopistas de Monçao, visitar a adega de Soalheiro, e visitar a Caixa dos brinquedos. Mañá continuarán por Vila Nova de Cerveira e O Rosal logo de no día de onte ter unha axenda apretada na que repetiron as actividades realizadas polo grupo de ‘influencers’ e blogueiros o pasado martes.  

 Na recepción institucional, Benítez explicoulles a representantes das axencias e maioristas o proxecto Visit Río Miño e o desenvolvemento da marca Río Miño que está a divulgar o AECT baixo os lemas ‘dous países un destino’ e ‘dous países, un destino, grandes experiencias’. Subliñou que se pretende facer un traballo estratéxico de construír no territorio un destino sobre o río  “que xera identidade, paisaxe e natureza propias”.  

 

Un guía de turismo informando aos participantes nesta iniciativa do AECT Río Miño

 “Os turismos de natureza, máis seguros e menos desenvueltos teñen moito futuro”, apuntou Benítez, amosándose claramente dacordo coas e cos representantes das axencias e operadores, que manifestaron o seu interese por redeseñar a súa oferta cara o mercado de destinos de proximidade. Estes destacaron, de feito, a súa necesaria especialización en produtos non masificados, de calidade e a medida, alternativos, con aloxamentos especiais, ou de viaxes de natureza, e subliñaron o interese de públicos europeos en destinos como o do Miño.   

 Ante os comentarios das persoas participantes no ‘famtrip’ –explicou Benítez- o AECT seguirá a afondar na súa estratexia de promocionar o territorio e a marca transfronteiriza por, ademais, estar situado nunha ubicación estratéxica entre Vigo e Porto.   

 A presentación do Miño transfronteirizo a ‘influencers’ e operadores organizada polo AECT vai durar toda a semana. Nos primeiros días as actividades estiveron dirixidas a un grupo de xornalistas, influencers e blogueiros moi activos e dunha grande experiencia tanto en medios estatais como internacionais: Alberto Ribas, coñecido como ‘Alvientooo’, finalista en diferentes premios estatais de ‘influencers’ de turismo; Daniel Keral, responsable de ‘Un viaje creativo’,unha web que recibiu o Premio Internacional de Comunicación Turística en 2017 como mellor blog revelación de viaxes; Eva Abal, encargada de ‘Una idea de viaje’ e colaboradora de diferentes revistas e na páxina ‘Hostelworld’; ou os representantes do suplemento de viaxes Fugas do xornal Público, de Portugal. Dende onte e ata venres o percorrido está dirixido a axencias e multinacionais organizadoras de paquetes de viaxes.  

 O ‘famtrip’ está organizado polo AECT Rio Minho como un fito de promoción do destino e a marca Rio Minho co obxectivo de desenvolver o produto turístico transfronteirizo baseado no patrimonio natural e cultural dentro do proxecto de preservación e valorización do territorio ‘Visit Rio Minho’, que baixo o lema ‘Un río, dous países, grandes experiencias’, está financiado ao 75% polo Fondo Europeo de Desenvolvemento Rexional (FEDER) a través do programa Interreg V-A España-Portugal (POCTEP) 2014-2020.