MOAÑA

Mobilización contra o peche de Abanca en Moaña e contra as  restricións de servizos á clientela 

· A CIG convoca unha concentración este venres 30 de abril diante da  oficina da rúa Concepción Arenal ás 12:00 horas  

Infogauda / Moaña

 "Abanca ten en marcha un plan escalonado de peches de oficinas e de restricións nos servizos na  atención presencial ao público (a partir de xuño só atenderán de 8:00 a 11:00 horas)". Así véno de comunicar á sección da CIG en Abanca.

 Segundo indica a CIG "peches e restricións forman parte dun plan imposto para dixitalizar á clientela, posto en marcha  conxuntamente polos bancos atentando contra a competencia, sen que houbese actuación por parte  da Xunta de Galiza ou do Ministerio de Economía.  

 No caso de Abanca, coma herdeira das Caixas de Aforros Galegas e coma primeira entidade  financeira galega, debera ter en consideración a propia dispersión xeográfica e o avellentamento da  poboación galega, antes de replicar as políticas bancarias deseñadas polos grandes grupos bancarios dende Madrid. 

 Unhas políticas impostas que buscan incrementar os beneficios a costa da destrución do emprego e  da marxinación financeira".

  Por iso a CIG convoca unha concentración para este venres 30 de abril diante da oficina de Abanca  na rúa Concepción Arenal de Moaña ás 12:00 horas.