O BNG na Guarda solicita reunión de portavoces para esixir á Xunta axudas á hostalaría tralas últimas medidas contra a COVID
Anxo Lois Baz Vicente (portavoz municipal do BNG no Concello de A Guarda): “Estamos diante dun peche encuberto, non é sostíbel manter un negocio de hostalaría coas medidas impostas pola Xunta.”
Infogauda / A Guarda
“O BNG vén de solicitar ao Alcalde da Guarda, por medio dun escrito, unha reunión urxente de portavoces para esixir á Xunta de Galiza que inclúa axudas ao sector da hostalaría no mesmo DOGA no que vai publicar as últimas medidas para frear a COVID”. Esa é a mensaxe de síntese que vén de dar a coñecer Anxo Lois Baz Vicente, portavoz municipal do BNG no concello guardés
“Para o BNG é fundamental - afirma Baz Vicente - que as administracións locais, os concellos, sexan portavoces das necesidades dos seus veciños e veciñas, polo que se fai necesaria unha acción conxunta para deixar dúas cousas claras: o apoio incondicional ao sector hostaleiro e distribución de importancia fundamental no concello e para esixir á Xunta de Galiza que inclúa un paquete de axudas ao sector ante as últimas medidas de restricións anunciadas polo Presidente da Xunta, Núñez Feijoo.
Dende o BNG entendemos que con estas medidas estase promovendo un “peche encuberto” da hostalaría, dada a imposibilidade de manter os negocios abertos, a pouco que se coñeza o sector, a climatoloxía e as características da Guarda”.
Segundo indica Anxo Lois Baz “as medidas decretadas como o peche dos salóns dos restaurantes e bares, a utilización das terrazas nun 30%,…, abocan ao peche dun sector de vital importancia para o noso concello”.
Finalmente Anxo Lois Baz declara que “o BNG espera altura de miras tanto do Alcalde como do resto das formacións políticas para ir cunha soa voz na defensa dun sector importantísimo para A Guarda que está sendo afectado sistematicamente dende o inicio da pandemia”.
Ningún comentario:
Publicar un comentario