A GUARDA

POR INICIATIVA DO BNG  

O CONCELLO DE A GUARDA ESIXE DA XUNTA DE GALICIA NOVAS MEDIDAS  NOS CENTROS DE ENSINO DIANTE DO COVID-19 

 

Vista parcial das persoas participantes na concentración celebrada fai uns días na Praza do Reló para esixir a Xunta de Galicia, que dote aos centros de ensino de suficiente profesorado e material  para garantir que  a actividade educativa se desenvolva con garantías sanitarias

Foto: BNG

 

Infogauda / A Guarda

 O pleno da Corporación Municipal do Concello de A Guarda súmase a reivindicación da comunidade educativa para esixir a Xunta de Galicia, que dote aos centros de ensino de suficiente profesorado e material  para garantir que  a actividade educativa se desenvolva con garantías sanitarias.  

 O concelleiro nacionalista Xosé Manuel Méndez Díaz, calificou como un auténtico despropósito por parte da Xunta de Galicia a posta en marcha deste comezo de curso. Na súa intervención diante do pleno manifestou: “A Xunta de Galiza tivo 6 meses para planificar o comezo do curso. Non escoitaron as ANPAS, nin aos representantes do profesorado. Presentaron un protocolo 6 días antes de comezar o curso que prima os criterios económicos por riba da calidade educativa e as garantías sanitarias. Non se respectan os criterios estabelecidos  para o resto da poboación, como poden ser as regras de distanciamento persoal. Non se recollen medidas específicas  para o alumnado con necesidades educativas especiais. Outro tanto ocorre cos comedores escolares. Tampouco se adopta ningunha medida que solucione os graves problemas que se manifestaron durante o confinamento á hora de impartir aulas de maneira telemática, como a fenda dixital, a formación do profesorado e alumnado”.  

 A proposta nacionalista aprobada polo pleno tamén reclama da Xunta de Galicia que se faga cargo dos traballos de desinfección e limpeza dos centros de primaria que recolle o protocolo e que son competencía do goberno galego.