GALICIA

O presidente do Goberno galego reuniuse esta tarde cos representantes de PPdeG, PSdeG, En Marea, BNG, Podemos e Ciudadanos

Feijóo escoita a opinión dos representantes dos partidos sobre a convocatoria electoral tras coñecer os informes sanitarios e xurídicos

O presidente do Goberno galego, mantivo esta tarde unha reunión cos representantes das principais formacións políticas galegas  
Foto: X.G.


O presidente da Xunta tomará unha decisión tras ter escoitado aos partidos e tendo en conta os informes dos expertos sobre a evolución previsible da pandemia 

O vixente estado de alarma aprobado no Congreso habilita expresamente para convocar comicios autonómicos

Infogauda / Santiago de Compostela

  O presidente do Goberno galego, Alberto Núñez Feijóo, mantivo esta tarde unha reunión cos representantes das principais formacións políticas galegas para coñecer a súa opinión sobre unha posible convocatoria electoral, despois de terlles enviado onte catro informes de expertos sanitarios e un informe xurídico no que se conclúe que se poderían convocar eleccións á maior brevidade e que o principio do verán sería o momento máis seguro.

 Feijóo mantivo un encontro presencial cos representantes de PPdeG -Pedro Puy-, PSdeG -Gonzalo Caballero-, BNG -Ana Pontón- e Podemos -Antón Gómez-Reino; no que tamén estiveron a través de videoconferencia os representantes de En Marea -Francisco Casal- e de Ciudadanos –Beatriz Pino-, e que se prolongou por dúas horas e media.

 O presidente da Xunta tomará unha decisión sobre a data da convocatoria electoral unha vez oídos os partidos e tendo en conta os informes dos expertos sanitarios sobre a evolución previsible da pandemia. Segundo dixo onte, os documentos expresan que o momento que ofrece menos incertezas para votar é o principio do verán, sendo a seguridade sanitaria maior canto antes se celebren os comicios e aumentando co paso dos meses, por un previsible rebrote en outono e porque xullo e agosto son os meses de maior afluencia de visitantes a Galicia procedentes doutros territorios.

 No plano xurídico, hai que recordar que despois de que a pandemia obrigase a suspender o proceso electoral previsto o 5 de abril existía o compromiso de activalo no prazo máis breve posible e que o vixente estado de alarma, que foi aprobado no Congreso dos Deputados, habilita expresamente para convocar comicios autonómicos.

 Feijóo trasladou aos partidos que tomará a decisión máis responsable segundo os datos certos que se coñecen e insistiu en que, en todo caso, o Goberno galego segue tendo como prioridade a loita contra a pandemia e a reactivación social, laboral e económica das familias e das empresas galegas.