TOMIÑO

AGAELA agradece o apoio recibido na 1ª Gala Solidaria pola ELA celebrada esta fin de semana 

A organización logrou reunir 1.225 euros que destinará para a compra de camas articuladas e cadeiras de ducha  

O Auditorio de Goián acolleu o domingo día 27 de outubro a Gala Solidaria pola ELA

Foto: C.T.

  
Infogauda / Tomiño

 Onte no Auditorio de Goián, tivo lugar a Gala Solidaria pola ELA (Esclerose Lateral Amiotrófica), organizada pola Asociación AGAELA (Asociación Galega de Esclerose Lateral Amiotrófica), coa colaboración do Concello de Tomiño, a Deputación de Pontevedra e comercios locais.

 José Manuel Pereira “Nel”, tomiñés afectado por esta enfermidade, impulsou esta Gala Solidaria pola Ela, cuxa recadación íntegra (1.225 euros) irá destinada a adquirir camas articuladas e cadeiras de ducha para persoas que sofren esta doenza. Pereira quere dar visibilidade a esta doenza que padecen en España máis de 4.000 persoas, abandeirado co seu lema: “La ELA existe, pero nosotros delante y la ELA detrás, siempre”.  

 A cita contou coa presentación da actriz moañesa Anabel Budiño, da compañía Moito Morro Teatro, e a actuación do Grupo de Acordeóns Helios, do Coro Passionato e da Escola de Danzas e Gaitas Virxe do Alivio; rematando cun desfile solidario, grazas a varias casas comerciais.  

 AGAELA quere agradecer a participación e apoio de todas as persoas e institucións e casas comerciais que prestaron a súa colaboración para mellorar a calidade de vida dos afectados por esta enfermidade na nosa comunidade autónoma.