OURENSE

Acto de entrega Premio Nóvoa Santos 

Asomega premia ao profesor José Ramón González Juanatey pola súa brillante traxectoria profesional 

O Grupo Coren, como entidade patrocinadora do certame, actuou como anfitrión da vixésimo primeira Edición do Premio Nóvoa Santos 

O doutor José Ramón González Juanatey recibiu o Premio Nóvoa Santos que concede a Asociación de Médicos Galegos, Asomega

Infogauda / Ourense

 O doutor José Ramón González Juanatey, xefe do servizo de Cardioloxía do Hospital Clínico de Santiago de Compostela e catedrático de Medicina na Universidade de Santiago de Compostela, recibiu o Premio Nóvoa Santos que concede a Asociación de Médicos Galegos, Asomega. 

 O galardón alcanzou a súa vixésimo primeira edición, nun acto celebrado no Salón de Actos das oficinas centrais do Grupo Coren, empresa patrocinadora do mesmo, onde o homenaxeado ofreceu a conferencia maxistral “Saúde cardiovascular e dieta”. 

 O xurado de Asomega valorou a traxectoria profesional do  Prof. González Juanatey, en todos os ámbitos: docente, investigador e asistencial aplicados ao desenvolvemento da Cardioloxía.

 O acto de entrega reuniu á xunta directiva, os presidentes fundadores, o Comité Científico, o presidente de honra da asociación, socios, doutores e amigos relacionados coa medicina e unidos polo sentimento de vinculación a terra galega. Máis dun centenar de persoas, nos que se atopaban ademais, autoridades sanitarias, académicas e políticas como Miguel Ángel Santalices Vieira, presidente do Parlamento de Galicia, Jesús Vázquez Almuiña, conselleiro de Sanidade, e o Prof. José Luis Labandeira García, catedrático de Anatomía da USC, encargado de ofrecer a laudatio previa á conferencia do premiado. En representación de Coren, como patrocinadora do acto, estiveron presentes o seu presidente, Manuel Gómez-Franqueira, acompañado dos membros da Xunta directiva e do Consello reitor da cooperativa.

Galicia por bandeira 

 O acto foi conducido e presentado por Ignacio  Balboa, socio e membro da xunta directiva de Asomega, quen outorgou a palabra, en primeiro lugar, a Manuel Gómez-Franqueira, anfitrión do acto. O presidente de Grupo Coren deu a benvida a todos os alí presentes, destacando a colaboración con este evento enmarcado dentro do compromiso de Coren coa sociedade galega. A cooperativa ten como obxectivo a produción de alimentos da máxima calidade e, nesa mesma liña, a promoción dunha alimentación saudable, segundo sinalou o presidente de Coren, quen tamén transmitiu a súa felicitación ao premiado pola obtención deste recoñecemento, como froito da súa destacada carreira profesional. 

 A continuación, Julio  Ancochea, presidente de Asomega, tomou a palabra e quixo resaltar a capacidade de liderado e o excelente  curriculum do premiado, así como a súa impecable traxectoria profesional, o seu compromiso con Galicia e a súa gran proxección internacional. Repasou as diferentes edicións do Premio Nóvoa Santos e animou aos presentes para participar no I  Encontro Mundial de Médicos Galegos que terá lugar do 19 ao 21 de setembro de 2019, en Santiago de Compostela. 

 Así mesmo, o presidente de Asomega quixo resaltar que "o profesor González Juanatey únese ás grandes figuras da Medicina galega, recoñecidas polo Premio Nóvoa Santos, pola súa relevancia, vinculación a Galicia e proxección da nosa terra”. 

 Aniceto Luís Charro Salgado, presidente de honra de Asomega, quixo facer unha mención especial á recoñecida dieta atlántica, como exemplo dunha alimentación excelente. 

 Unha intervención que tomou a substitución nas sentidas e próximas palabras da laudatio do Catedrático de Anatomía da Universidade de Santiago de Compostela, o profesor José Luis Labandeira García. 

 A continuación, o homenaxeado ofreceu a súa maxistral conferencia centrada na saúde cardiovascular desde unha visión enfocada no seguimento dunha adecuada dieta. “Preto do 90% das enfermidades cardiovasculares prematuras poderían previrse cun estilo de vida adecuado, no que non fumar, dieta e exercicio xogan un papel principal”, subliñou o Dr. José Ramón González Juanatey.

 O premiado puntualizou que “as enfermidades cardiovasculares están a concentrarse nos niveis socio-económicos máis baixos, en relación ao seu peor estilo de vida: máis tabaquismo, peor calidade da dieta, máis sedentarismo...”. 

 Unha vez finalizada a súa conferencia, o Dr. José Ramón González Juanatey recolleu a medalla e o diploma de mans do presidente do Parlamento de Galicia, Miguel Ángel Santalices Vieira, que describiu ao homenaxeado como “un home de valores, crítico, íntimo amigo da excelencia e cuxo compromiso coa sanidade pública, faille ser un referente no ámbito estatal.” 

 Pechou a quenda de intervencións, o conselleiro de  Sanidade, Jesús Vázquez Almuiña que resaltou o labor que realiza Asomega Internacional, cunha rede de médicos galegos moi importantes por todo o mundo. 

 A Real Banda de Gaitas dá Excma. Deputación de Ourense encargouse de poñer o broche final ao acto, interpretando o Himno de Galicia.

Sobre Asomega 

 ASOMEGA, está integrada por médicos e persoas dedicadas á sanidade de orixe galega, educación universitaria galega e/ou sensibilidade especial con Galicia. Foi fundada en 1994 e entre os seus fins está o promover a comunicación e relacións interprofesionais e humanas entre todos os asociados, coas Universidades de Galicia e en especial coa Universidade de Santiago de Compostela. Anualmente convoca o premio Profesor Nóvoa Santos, que se concede a unha personalidade relevante da medicina/sanidade galega ou estreitamente vinculada a Galicia, así como a entrega anual da Insignia de Ouro de ASOMEGA, a personalidades doutros ámbitos sociais polo seu apoio a ASOMEGA ou o seu labor en favor de Galicia e a súa cultura. 

Grupo Coren 

 Grupo Coren, entidade patrocinadora do Premio Nóvoa Santos, é a principal cooperativa agroalimentaria cárnica de España. Conta que xera un volume de emprego de 6.000 familias entre socios e traballadores, dedicados á produción de alimentos 100% galegos e da máxima calidade, baseándose sempre nos principios de benestar animal, respecto ao medio ambiente, innovación e  trazabilidad. A cooperativa contribúe á xeración de riqueza e emprego no medio rural galego, xa que toda a súa actividade tanto de produción como de procesado mantéñense en Galicia, como froito do seu compromiso coa sociedade galega.