A GUARDA

A vila continúa coa súa ampla programación de Nadal

· Con cinema, pista de xeo e a Cabalgata de Reis

Infogauda / A Guarda

 O Nadal continúa na Guarda cunha extensa e variada programación de actividades nas que se inclúen cinema, animación musical polas rúas, obradoiros de decoración, chocolatadas,  pista de xeo, e a Cabalgata de Reis.  

 A pista de xeo que está instalada na Alameda xa recibíu a visita de máis de 1.500 persoas. As entradas teñen un custo de 6€ de xeito anticipadas nos establecementos da vila e 7€ na propia pista, cunha duración de 45 minutos para gozar por primeira vez na Guarda da patinaxe sobre xeo. O aluguer dos patíns é gratuíto e recórdase que se deben de traer luvas para as mans. 

 O día 1 de xaneiro a pista de xeo funcionará só en horario de tarde, de 16:00 a 22:00 horas e os días  5 e 6 de xaneiro funcionará de 11:00 a 14:00 horas e de 16:00 a 22:00 horas.

 A programación de actividades do Nadal continúa o mércores día 2 na Casa dos Alonso cun Obradoiro infantil “Decora a túa casa” no que nenas e nenos da vila aprenderán a realizar adornos de Nadal, nunha actividade de 2 horas de duración para un máximo 15 participantes. As prazas para esta actividade xa están esgotadas.  

 Na xornada do xoves día 3 de xaneiro, de 11:00 a 13:00 horas continúa a animación musical de rúa a cargo do grupo “Do Lusco ó Fusco”, visitando o Mercado da Praza de Abastos, que este día acollerá tamén unha chocolatada de balde.  

 Tamén na xornada do xoves 3 de xaneiro ás 17:30 horas, o Centro Cultural acolle unha nova sesión de cinema infantil coa proxección de “Capitán Calzoncillos”. Un filme para público infantil onde dous rapaces gozan facendo bromas e debuxando cómics na súa escola. 

 Esta é unha actividade enfocada a conciliación laboral que permitirá que as nais e pais teñan un tempo libre para facer compras na vila.  

 As súas Maxestades de Oriente visitarán o venres 4 de xaneiro pola tarde aos nosos maiores na Residencia da Terceira Idade Monte Tecla. Estarán acompañados pola Charanga Vaia Panda e o Grupo Do Lusco ó Fusco, ademais de contar coa presenza do alcalde, da concelleira de Turismo e da concelleira de Servizos Sociais.

  

 O sábado día 5 de xaneiro terá lugar un dos actos máis importantes do Nadal na Guarda, a Cabalgata dos Reis Magos que sairá ás 18:00 horas, da dende a Alameda acompañados pola comitiva de paxes, 5 asociacións da vila e unha charanga que amenizará musicalmente este evento. Os Reis Magos percorrerán as rúas Rosalía de Castro e Galicia para terminar na Casa dos Alonsos, onde recibirán as nenas e nenos entregando agasallos e lambonadas para todos. Durante o percorrido repartirán caramelos dende as súas carrozas. 

 Dende o Concello da Guarda se convida seguir participando e gozar dunha programación de Nadal que, sen dúbida, está dinamizando a vila e chama a atención dos nosos veciños e visitantes.