O ROSAL

O ROSAL MEDRA CONTIGO

Cando naza un bebé, a cada familia entregaráselle información variada sobre as axudas das administracións, os programas que a Xunta de Galicia ten en marcha para as familias e tamén sobre a educación en igualdade

Infogauda / O Rosal

 O Concello do Rosal acaba de poñer en marcha o proxecto “O ROSAL MEDRA CONTIGO”. 

 Con esta iniciativa quere dar a benvida aos bebés que nacen no Rosal e que medrarán e convivirán nos nosos barrios e parroquias. Cando naza un bebé, a cada familia entregaráselle información variada sobre as axudas das administracións, os programas que a Xunta de Galicia ten en marcha para as familias e tamén sobre a educación en igualdade, xa que é responsabilidade do concello velar pola igualdade entre nenos e nenas. 

 Así mesmo farase entrega a cada familia dun pequeno carballo, árbore nosa autóctona, co compromiso de que sexa prantado no xardín familiar ou nun dos montes do noso concello, para que medre xunto co bebé e sexa un pequeno vínculo coa nosa terra.