A GUARDA

A Guarda acollerá o XI Encontro da Cultura Celta

Comezará o venres día 10 de agosto a partires das 10:30 horas, no Salón de Actos do Centro Cultural 

Enrique Santín, José Luis Pardo, Blanca G. Fdez Albalat, viúva de Moralejo Álvarez, Marcial Tenreiro, Michael Koch, Martín Almagro, Jesús Javier de Hoz, Thomas G. Schattner, Andrés Aúz, José Ramón Ónega, Antonio Cano, Carlos de Blas, Armando Coelho, José Cerdeira, Julio Domínguez e Ramón Sainero, membros do colectivo "Amigos da Cultura Celta", nun encontro celebrado na Casa de Galicia en Madrid. Foto: Casa de Galicia, en Madrid

Infogauda / A Guarda

 Como ven sendo habitual cada ano, o colectivo «Amigos da Cultura Celta», que agrupa a máis dun cento de expertos e afeccionados de diversos países de Europa e de América prepárase para celebrar o «Encontro da Cultura Celta», que neste 2018 acada súa XI edición.

 As actividades programadas para o XI Encontro da Cultura Celta, comezarán o venres 10 de agosto a partires das 10:30 horas, no Salón de Actos do Centro Cultural da Guarda, sito na Rúa Rosalía de Castro, 14.  

 Entre as previsións destaca o acto solemne de entrega de distincións e recoñecementos a personalidades do mundo da docencia, investigación, difusión da cultura e da conservación do patrimonio, amenizando a actividade con música celta.  

Vista parcial do poboado Calvo, no xacemento arqueolóxico do Monte Santa Trega (A Guarda)

Foto: Infogauda

 Asemade, os participantes visitarán o xacemento arqueolóxico do Monte de Santa Trega - un dos enclaves máis atractivos do Noroeste peninsular -, contando coas explicacións do Director de Conservación e Interpretación.  

 O obxectivo que procura este colectivo é dar a coñecer, cunha perspectiva histórica, o incalculable valor do noso patrimonio celto-castrexo, potenciando o gran interés turístico-cultural que posúe, tal e como o veñen facendo outros «países celtas» dos finisterres europeos.  

 Ao acto, que será de carácter público, asistirán autoridades académicas e políticas, expertos na temática celta, de 6 universidades españolas e portuguesas, docentes, escritores, xornalista e destacados especialistas e intérpretes do que se considera a «música celta».  

 Sen dúbida será un salientable evento cultural que contribuirá a un maior coñecemento do patrimonio prehistórico de A Guarda.