A GUARDA

O BNG solicita ao PP da Guarda que deixe de enredar co Acceso Sur do porto e esixa a Xunta a súa execución  

“O BNG quere mirar para adiante: Que o PP da Guarda poña día e hora para ir falar co representante da Xunta que consideren idóneo e saír desa reunión con partida e prazos para executar a obra”. afirma Ángel Luis Baz Vicente,  portavoz municipal do BNG

Ángel Luis Baz, portavoz municipal do BNG no Concello de A Guarda

Infogauda / A Guarda

 “O BLOQUE NACIONALISTA GALEGO, ante as manifestacións do PP da Guarda sobre a proposta nacionalista para que a Xunta de Galiza realizase o acceso sur do porto da Guarda, quere mirar cara adiante e unir esforzos para que ese acceso sexa unha realidade. Pero hai que aclarar unha serie de puntos para que o PP non tome o “pelo” ao pobo da Guarda”, ven de afirmar Ángel Luis Baz Vicente, portavoz municipal do BNG.  

 Segundo relembra Ángel Luis Baz “o PP da Guarda votou a favor dunha iniciativa no Concello que era moi parecida á presentada pola deputada do BNG Montse Prado Cores, se a iniciativa era equivocada, deberan votar en contra da mesma.  

 A iniciativa do BNG, pretendía sacar un compromiso do PP para dotar unha partida dos orzamentos da Xunta para a realización do Acceso Sur, pero o PP non adquiriu tal compromiso.  

 Portos de Galiza ten realizado obras de mellora de accesos e infraestruturas en diferentes Portos do país, como así o recoñeceron membros do Goberno galego.  

 Para o sector pesqueiro artesanal e para as redeiras, a construción do Acceso Sur élles unha obra beneficiosa e importante para a súa actividade económica, que redundaría positivamente no resto do pobo da Guarda, tal que como o fixeron saber en diferentes reunións tidas cos colectivos.  

 A deputada do BNG, Montse Prado, chegou a propoñer a retirada da iniciativa nacionalista se o PP adquiría un compromiso firme coa execución do Acceso Sur guardés, pois nin por esas se comprometeron”.  

 “No BNG queremos mirar para adiante. Que o PP da Guarda poña día e hora para que vaiamos unha delegación do Concello da Guarda a falar con quen consideren oportuno na Xunta e saír desa reunión cunha partida de cartos e con prazos para executar o acceso sur”. Ese é finalmente, o reto que lanza Ángel Luis Baz, portavoz municipal do BNG.