PATRIMONIO

Forte de Santa Andrea em Veneza, bases geométricas prolongadas

Forte de Santa Andrea, em Veneza

José Buiza Badás

 Já citados os exemplos de Forte Palmaria e o Forte de Moros, vamos abordar esta obra espetacular veneziana. Este empreendimento de metade do século XVI e reformado a finais do XVIII, dispom um polígono externo prolongado de seis lados e 745 metros. O seu perímetro real é de 805 m. de comprimento, possuindo um lado maior de 307 m. e um outro menor de 255 m. Estas projeçons lineares revelam umha clara intencionalidade para tentar dissuadir o inimigo com tiros baixos na linha de água. A planimetría é bem exponencial desse propósito.

 Obtem-se umha simetrizaçom apartir dum eixo de 170 m. que tem por protagonista aquela Porta de Água central. Esta grande bateria frontal curva mede 275 m. e recolhe umha superficie de 3.160 m2. Os extremos están formados por 2  meios-baluartes. Ao longo da bateria ponteiam um total de 40 bocas de fogo ou troneiras, incluindo as da frontaria, quase que na linha de flutuaçom. Estas bocas tenhem umha aduelagem de 3 x 3 e a peça chave com cabezas leoninas, símbolo de Veneza. 

 Ao longo do paramento percorrem paralelas a linha magistral e a cornija. A Porta de Água central, de 20 m., recolhe um aparelho regular rusticado feito “à saltacavalo”. Compom-se dum portóm central e dous arcos laterais a disporem cada um deles de troneira. Ademais, distribue-se umha aduelagem de 6 x 6 peças. Duas pilastras de canto e quatro colunas encastradas abrigam estes vans. O torreom superior dota-se de umha lápide comemorativa da batalha de Lepanto e acima dela o sempiterno leóm de asas veneziano. Os arcos  tenhem arrostados (cabeças humanas, de rosto) nas aduelas chave. O entabulamento tem seriaçom de triglifos e metopas (estas alternam os motivos do leóm, da nau marinha e do medalhóm).

 Utilizarom-se materiais construtivos baseados na pedra (pietra veneziana), no tijolo e o mero terraplenado. Atualmente, padece algumhas patologías decorrentes do nível das águas e das próprias fundaçons, que já em tempos forom parcialmente resolvidas com um acrescido doseamento de nova base.

 A geometría de prolongamento, de esticamento, sublinha o carácter de implantaçom no terreno, de conjugaçom com a paisagem. Há outros exemplos, mas estes som obra núcleo e nom obra externa (os casos de Fenestrelle no Piamonte ou Bitche na Lorena).

 R.P.I.