CULTURA

CINEMA

"LURNA", UNHA NOVA HISTORIA DO REALIZADOR NANI MATOS 

Nesta súa terceira curtametraxe, a protagonista é Diaryatou Daff, unha actriz senegalesa afincada en Madrid

Na rodaxe participaron máis de cen persoas

Infogauda / A Guarda

 No pasado mes de xullo, a cidade de Pontevedra foi escenario da rodaxe dunha curtametraxe que dirixiu o realizador de Camposancos (A Guarda), Laureano Matos Barcia (Nani Matos).

 A historia, que leva por título "Lurna", conta no seu elenco con Diaryatou Daff, coñecida actriz senegalesa afincada en Madrid, que alcanzou a fama ao traballar co oscarizado Javier Bardem na película "Biutiful", de Alejandro González Iñárritu.

 Ademais da xoven africana, tamén traballan neste proxecto outros actores coñecidos como Luis Iglesia, Xavier Deive, Santi Prego, Miro Magariños, Xose M. Esperante ou Humy Doado. Todos eles, caras coñecidas nas diversas producións da comunidade autónoma galega ou rostros das series que se emiten na televisión pública de Galicia.

 Esta nova curta, rodouse maioritariamente na cidade pontevedresa - onde reside Nani Matos desde fai uns anos -, agás un día, no que o equipo formado por unhas 80 persoas, trasladouse a Caldas de Reis. Dese xeito, varias rúas e locais da cidade do Lérez, o concello, os xulgados,..., acolleron os actores e equipo técnico, para plasmar de xeito verídico unha historia de forte contido social sobre a inmigración.

 O proxecto conta co apoio da Deputación de Pontevedra e o Concello, así como de varias empresas, xunto co da asociación senegalesa Diocco, da capital pontevedresa, onde se rodaron escenas nas que participaron os seus propios integrantes.

 Este é a terceira curtametraxe de Nani Matos, despois de "Dies Dei" (2009) e "Flores para Amalia" (2013) ambos tamén escritos polo propio realizador. Polo último deles alcanzou repercusión fóra das nosas fronteiras e foi premiado no Festival de Cans, Festival Internacional de Cine Social de Castilla-La Mancha, Festival de Curtos Por Amor Á Arte da Coruña e Mención Especial do Xurado Taranto in Short en Italia.

 Polo que respecta a Diaryatou Daff, este é tamén a súa terceira curtametraxe. Tras o éxito de "Biutiful" chegou "Stop" (2012) e "Jazmín" (2013). 

 O tratarse dunha produción independente, fixo que os recursos crematísticos para a rodaxe fosen limitados, pero o amor pola profesión fixo posíbel unha vez máis, que artistas e traballadores do medio colaboren con proxectos así.

 A día de hoxe todo indica que logo de rematada a postproducción de audio, a gala de presentación da curtametraxe non se demorará.