A GUARDA

PATRIMONIO
Castelo de Sta. Cruz: Composiçom dos muros e efeitos da erosom

Guarita e lenços murários da Fortaleza de Santa Cruz (A Guarda)

Foto: Infogauda

José Buiza Badás

 Os elementos basilares dos lenços murários que perimetralizam este enclave, seja nos bastions, seja nas cortinas, dám corpo a um  aparelho de alvenaria ordinária que encontra umha regularizaçom abase de silhar nos seus elementos de aparato (portas ou trânsitos, cunhais ou aristas). Sem embargo, temos que salientar que as cimas parapetais contenhem tamanhos menores na aparelhagem e que entre estas e o alambor dos taludes NOM HÁ LINHA MAGISTRAL OU CORDOM NENGUM. Os canteados afetam dessa forma a cuatro pontos estruturais, para além do precálculo regularizado de peças de abóbada nos dois corredores.

 De resto, conferirmos umha alvenaria de pedras maiores e menores, colmatada por enripiado, que nom tem careado nenhum, que nom ultrapassa a irregularidade e que tem ainda umha funçom de revestimento dum interior feito de possível emplecto, recheio de pedra e terra, desolidarizado, com muitos ligantes vegetais e levantado a seco. Referímo-nos, é claro, aos tramos de muro antigos. Recentemente, o empreendimento feito na cortina nova do Socorro e no bastiom da Guia, alternados também em troços da cortina da Vila (outros nem forom tratados) exprimem umha pseudoisodomia em fiadas, de peças de silharia de entre 1,15 m., 1,30 m., 1,70 m., 2 m. ou 2,30 m. de comprimento bem como 60 cms. de largura, a conformarem umha longa folha de revestimento, nom de colmataçom, que assegura a fixaçom e o  entibamento dumha massa interior do reparo reforçada por tizons ou juntouros perpendiculares. Esta obra nova poderá eventualmente ser alvo de críticas e polémica, dado o forte contraste que tem com os taludes e parapeitos mais recuados no tempo. O travamento de massas  murárias tam fragilizadas como as que recolhia este verdadeiro hóstigo geral do forte, submetido a golpes de frio e água, foi sempre difícil. O contraventamento de toda essa alvenaria a cair pola escarpa, por mor dumha feitura apressada, com materiais de substituiçom locais, determinou um acometimento talvez conformista, onde mais umha vez a obra em torrom viria a  ser determinante.

 A filtragem de humidades nestes tramos novos  resolve-se com filtros ou cotanas de drenagem a atravessarem os silhares no encontro de juntas com sobreleitos. Vem ao calhas portanto tratarmos do problema endémico inerente a construçons acasteladas, que nom é outro senom o das patologias derivadas da capilaridade, da meteorizaçom física, química ou biológica registada nas alvenarias. Convém classificar um repositório de afeçons decorrente da descompressom, das termoclastias, da gelifraçom ou dessas haloclastias  subjacentes ao sal marino. Também, tratar problemas de oxidaçom, dissoluçom, hidrataçom ou carbonataçom. Nom menos preocupante seria a meteorizaçom biológica conferida pola açom de vegetais e animais.

 O reparo em Sta. Cruz  (talude e parapeito, adarve, paradós e contramulralha) é rico nestas manifestaçons.

 R.P. Intelectual