VAL MIÑOR

Outubro recibe o ciclo “Cine e Memoria II” no Val Miñor

                                                            Cartel do Ciclo | Fino Lorenzo

Instituto de Estudos Miñoranos / Gondomar

 O informe provisional do Relator da ONU, Pablo Greiff  trala súa visita a Galicia en xaneiro, así como o reclamo do mesmo organismo –por 4ª vez – ao Estado español para que cumpra coas diferentes lexislacións que en materia de dereitos humanos ten asinadas, reflicten o estado marxinal na que se atopa a problemáticas das vítimas do franquismo e a impunidade dos crimes dese réxime. As xornadas provinciais de Memoria Histórica organizadas polo Instituto de Estudos Miñoranos no 2009, deixaron en evidencia que arestora emprender unha investigación na procura de información para esclarecer o acontecido así como calquera intento de desenvolver exhumacións de fosas enfronta innumerables pegas por parte das administracións públicas.

 Neste contexto, o Instituto de Estudos Miñoranos organiza como todos os anos dende 2005 unha actividade especial no mes de outubro, onde se lembra o asasinato dos nove veciños do Val Miñor en mans da represión franquista na madrugada do 15 ao 16 de outubro en Baiona.

 O ciclo “Cine e Memoria II”, será o evento cultural que como en 2009, pretende achegar ao Val Miñor os últimos traballos documentais e de investigación en materia de Memoria Histórica. O mesmo congregará a directores, produtores e protagonistas dos cinco títulos que acolle o ciclo. Películas que abordan desde diferentes miradas o tema da recuperación da memoria familiar (O segredo da Frouxeira), a vida clandestina nos monte de fuxidos e guerrilleiros (O meu nome é Luis “Ferreiro”), as masacres colectivas (La Sauceda. De la Utopía al horror), a represión ás mulleres da resistencia (As silenciadas), e un documental de especial pegada na historia recente do Val Miñor, A Volta dos Nove.

 Os pases dos filmes terán lugar todos os días mércores do mes de outubro ás 20:30 horas na Aula de Cultura Ponte de Rosas, agás o 15 de outubro no que será a estrea no Val Miñor do filme A Volta dos Nove, que será exhibida no Auditorio Municipal de Gondomar Lois Tobío. A entrada será gratuíta e ata completar o aforo das salas.

 Programa do Ciclo

1 de outubro: O segredo da Frouxeira, de Xosé Abad. (Galicia, 2009).

8 de outubro: O meu nome é Luis “Ferreiro”. Unha historia do antifranquismo galego, de Roi Caoio e Fernando Llorl. (Galicia, 2010).

15 de outubro: A Volta dos Nove, de Antonio Caeiro. (Galicia, 2014).

22 de outubro: La Sauceda. De la utopía al horror, de Juan Miguel León Moriche. (Málaga, 2013).

29 de outubro: As silenciadas, de Pablos Ces. (Galicia, 2010).