O ROSAL

A DEPUTACIÓN A HIDROMIÑO S.L. AS OBRAS DE REPARACIÓN DO DEPÓSITO MUNICIPAL DE AUGAS DE MARTÍN, EN O ROSAL

· Esta actuación permitirá mellorar o abastecemento no concello

· Once empresas presentaron ofertas para encargarse da execución dos traballos, que se adxudicaron en preto de 82.000 euros

  A Deputación de Pontevedra vén de adxudicar á empresa Hidromiño S.L. as obras de reparación e mellora do depósito municipal de augas de Martín, no concello de O Rosal, no que se investirán 82.000 euros.

  En total foron 11 as empresas que presentaron ofertas para a execución destes traballos, cos que se pretende corrixir os danos que presenta a citada infraestrutura e mellorar o rendemento do depósito e as súas condicións de salubridade.

  Cunha capacidade de máis de 1.600 metros cúbicos, o depósito dá servizo aos veciños de Martín, pero nestes momentos presenta unha notable deterioración que fai imprescindible a súa reparación.

  Entre os danos detectados figuran numerosas gretas e falta de impermeabilización na cuberta, polo que se producen filtracións ao interior e danos en vigas e piares. Así mesmo, presenta fisuras nas paredes exteriores e desprendemento do material de revestimento interior, ocasionándose perdas de auga e problemas de salubridade polo mal estado interno do depósito, que tamén ten deficiencias no solado.

  Os traballos consistirán na demolición do forxado da cuberta e a construción dunha nova, a base de lousa oca prefabricada de formigón, que se colocará sobre os piares existentes reforzados e sobre novas vigas prefabricadas.

  Tamén se procederá á limpeza de paramentos verticais exteriores, colocaranse grampas para pechar as fisuras e selaranse. Os paramentos interiores limparanse con chorro de auga a presión e posteriormente aplicaráselle un tratamento impermeabilizante.

 Finalmente, dotarase dunha soleira con pendente e arqueta de recollida para facilitar as labores de limpeza.