A DEPUTACIÓN COLABORA CO CONCELLO DE BAIONA NA MUSEALIZACIÓN DA CASA DA NAVEGACIÓN
A Xunta de Goberno aprobou o expediente de contratación para os traballos de deseño, montaxe e mantemento das salas de exposición
·
Os traballos contan cun
orzamento de 150.000 euros
·
A colección visitable
instalarase na Casa María Carvajal
A Xunta de Goberno da Deputación de Pontevedra
aprobou, na súa xuntanza desta mañá, o expediente de contratación para a
musealización da Casa de Navegación de Baiona.
Os traballos contan cun orzamento de 150.000
euros e suporán o deseño e montaxe das salas de exposición da Casa María
Carvajal dedicadas ao mundo da navegación e o mar.
O obxectivo é crear un museo vivo e dinámico que
dea fe da profunda vinculación histórica de Baiona coa navegación e a súa
relevancia como porto marítimo. Incluiranse representacións históricas de
modelos de navíos, instrumentos náuticos, mapas, as pezas arqueolóxicas
recuperadas durante os traballos de ampliación do porto pesqueiro e abondosa
documentación.
Unha vez recuperado o edificio no que se vai
instalar esta colección visitable, agora a Deputación saca a licitación o
deseño, subministración, instalación e mantemento dos equipamentos
museográficos.
Así a empresa adxudicataria deste concurso será a
responsable de deseñar e montar a exposición permanente; deseñar o equipamento
e instalación das distintas salas; subministrar e instalar (por parte de
equipos técnicos especializados) os elementos de iluminación en todos os
espazos destinados a exposición, e que se situarán no baixo e no primeiro andar
do edificio; así como a instalación de filtros anti UVA nos vidros das
fiestras.
Deberá tamén formar ao persoal da Casa da
Navegación no manexo dos equipos.
Ningún comentario:
Publicar un comentario