PONTEVEDRA

CON BARQUEIRA E REMADOR, ANTOLOXÍA POÉTICA  QUE UNE LINGUAS E CULTURAS, HOXE NO SARMIENTO

·       A obra presentada esta mañá en rolda de prensa no Pazo Provincial, presentouse ao público pola tarde no Edificio Sarmiento coa presenza  de Yolanda Castaño

A deputada provincial Ana Isabel Vázquez presentou esta mañá no Pazo Provincial a obra Con barqueira e remador, xunto o secretario xeral da Xunta, Anxo Lorenzo; Valentín Gómez, director Xeral de política lingüística; Javier Bas, alcalde de Redondela e a poetisa Yolanda Castaño.

Se trata da obra resultante do Obradoiro Internacional de Tradución Poética no que poetas de seis linguas e culturas diferentes, se xuntaron para achegarse ao coñecemento mutuo das súas culturas, idiomas e realidades e crear así este poemario onde linguas con gran número de falantes como o ruso se dan a man con outras de ámbito máis reducido como o islandés, o catalán, o finlandés, o esloveno ou o propio galego.

Con barqueira e remador recolle o traballo de poetas que cren na súa lingua e na súa cultura e a defenden, e que o fan desde unha visión global e universalizadora; conscientes de que unha cultura pechada e ensimismada é unha cultura morta, mentres que cando se abre ao mundo renace, cobra forza e vitalidade.

O escenario, a Illa de San Simón, a illa na que cantou Mendiño, convértese no lugar de encontro de poetas no que acolleu durante sete días aos autores desta antoloxía.

Lingua e cultura universal

Ana Isabel Vázquez destacou que se trata unha aposta pola cultura galega e pola nosa lingua, “como diciamos na presentación de Babelia o pasado ano, se algo teñen as linguas é que non se desprezan, senón que se enriquecen mutuamente; non separan, senón que unen, e por iso esta obra se converte nun proxecto expansivo e unha forma de universalización”.

Pola súa parte, Yolanda Castaño calificou esta obra como unha xoia de defensa e apoio da lingua, un proxecto no que seguir traballando como así se fará no vindeiro taller que se desenvolverá na Illa de San Simón con 7 novos poetas entre o 14 e o 19 de outubro entre os que estarán Gökçenur Ç; Kätlin Kaldmaa; Anna T. Szabó, Samira Negrouche, Lawrence Schimel, Xuan Bello, e o galego Isaac Xubín.

Esta tarde a obra se presentou ao público no Edificio Sarmiento, un espazo para a Cultura con maiúsculas, nas súas máis variadas representacións: tanto para a que ten séculos de historia como para a que, coma esta obra ou as que se expoñen na mostra de Novos Valores, acaba de nacer; tanto para a que xurdiu na mesma provincia como para a que cruzou mares e montañas para chegar ata aquí.

O evento desta tarde tivo lugar ás 20.00 na Sala Sánchez Mesas-Fernández de Tejada do Edificio Sarmiento e contará coa presenza de Yolanda Castaño e a deputada provincial, ademais de dous dos participantes do I Obradoiro, acompañados dun recital de arpa celta “Lendas do Mar” a cargo de José Maquieira.

A través desta publicación a Deputación de Pontevedra amosa o seu compromiso de colaboración na difusión de obras que, coma esta, contribúen a enriquecer a cultura e a lingua galega, non só axudando a difundila máis alá de fronteiras, senón tamén permitíndolle beber doutras linguas e doutras culturas.