OIA

OS PLENOS DO CONCELLO DE OIA SERÁN ÁS 20:00 HORAS
- A proposta foi presentada polo Grupo Municipal do BNG

Infogauda / Oia

No pleno ordinario celebrado o venres día 25 de novembro, no Concello de Oia, o BNG levou dúas mocións de urxencia. Nunha delas, o Grupo Municipal do BNG propuxo que as sesións plenarias se celebren ás 20:00 h. e foi .
Na outra moción, sobor do decreto da tarxeta sanitaria, a abstención de un concelleiro do Grupo Municipal Socialista, impediu que se aprobase á parte dispositiva da proposta do BNG.

MOCIÓN DE URXENCIA

D. J.Miguel Giráldez Martínez, concelleiro do BNG, fai a seguinte

EXPOSICIÓN DE MOTIVOS
O horario no que se veñen celebrando as sesións ordinarias e extraordinarias dos Plenos da Corporación impiden, dificultan e limitan a asistencia da maioria da veciñanza.
Por conseguinte, proponse ao Pleno da Corporación municipal a adopción do seguinte

ACORDO
Que se establezan as 20:00 horas como horario das sesións ordinarias e extraordinarias dos Plenos da Corporación.


En Oia, a 24 de novembro de 2011

Asinado: J.Miguel Giráldez Martínez

MOCION CAMBIO HORARIO. Esta proposta do BNG foi aprobada con 5 (BNG+PSOE) votos a favor e 4 en contra (PP), pola falta de dous concelleiros do PP, que antes da votación se foron do pleno para ir o seu posto de traballo privado. Polo tanto os próximos plenos serán ás 20:00 horas. O horario nos que se viñan celebrando as sesións ordinarias e extraordinarias dos Plenos da Corporación impidían, dificultaban e limitaban a asistencia da maioria da veciñanza.

MOCIÓN DE URXENCIA

D. J.Miguel Giráldez Martínez, concelleiro do BNG, fai a seguinte

EXPOSICIÓN DE MOTIVOS
O día 9 de setembro de 2011 a Consellaría de Sanidade da Xunta de Galiza publicou no Diario Oficial unha orde na que regula o dereito de acceso á asistencia sanitaria para as persoas sen recursos económicos suficientes e para as persoas desempregadas. Posteriormente remitiu aos centros de saúde un Protocolo de traballo para a posta en marcha da devandita Orde. Neste protocolo indícase: “Dende a entrada en vigor da Orde as persoas sen recursos que soliciten teñen dereito á atención de urxencias e emerxencias, polo que, ante á solicitude dunha atención urxente é necesario dar unha alta rápida no aplicativo con documentación acreditativa "PRIVADO", previa busca do cidadán na aplicación, sempre se lles entregará o modelo de compromiso de pago para que o asinen, escribindo a man (mentres non estea preparado o modelo na aplicación) o seguinte texto: Persoas sen recursos económicos suficientes en tramitación. Só asistencia urxencia/emerxencia.”
Segundo se indica no texto literal reproducido, as persoas afectadas só teñen dereito, previo compromiso de pago, á atención de urxencias e emerxencias, é dicir , perden o dereito á sanidade pública universal, fican sen médico/a de cabeceira, sen probas diagnósticas nin especialistas, non teñen, en definitiva, asistencia sanitaria completa. Estas persoas quedan tamén sen a asistencia farmacéutica até que volvan a ter todos os papeis en regra para volver estar de alta.
O proceso de clasificación das persoas afectadas nunha nova categoría non pode conlevar a desactivación dos seus dereitos sanitarios e menos sen recibir información por parte do Goberno galego do que está a suceder.
Todas as persoas afectadas terán a obriga de solicitar unha tarxeta de persoas sen recursos mais esa solicitude pode tardar en aprobarse entre oito e dez meses, polo que durante todo ese tempo permanecerán sen asistencia gratuíta

Esta orde está totalmente inxustificada, é inhumana e desoladora, xa que vulnera os dereitos básicos da cidadanía e rompe os principios de universalidade e equidade da Sanidade Pública. O goberno do PP na Xunta de Galiza está a levar adiante unha serie de medidas que pretenden a privatización e o desmantelamento da sanidade pública no noso país como demostra a redución de persoal sanitario mediante a non cobertura de baixas e xubilacións, a redución de consultas e actividade nos quirófanos na quenda de tarde, o incremento dos concertos privados, a entrada de capital privado no financiamento dos novos hospitais ou o recorte de 237 millóns de euros no orzamento da sanidade pública.
Por todo isto, proponse ao Pleno da Corporación municipal a adopción do seguinte
ACORDO
Instar á Xunta de Galiza a
1. Retirar de xeito inmediato o Protocolo que desenvolve a Orde de 5 de setembro de 2011 publicada no DOG do 9 de setembro.
2. Restituír todos os dereitos das persoas que foron prexudicadas polo mencionado Protocolo reactivando as tarxetas anuladas.
3. Evitar que os cambios burocráticos que se deban realizar repercutan no exercicio dos dereitos sanitarios da poboación galega.


En Oia, a 24 de novembro de 2011

Asinado: J.Miguel Giráldez Martínez

Esta moción sobre o decreto TARXETA SANITARIA non foi aprobada a pesar de estar en minoría o PP, xa que Gerardo Rodríguez Refojos, concelleiro do PSOE, abstívose na votación.