OPINIÓN

BÚSCASE...

Achéganse as eleccións e con elas o dilema de pensar A quen vou votar?

Estou canso de ver que cambian as caras unha e outra vez, pero sempre é o pobo o que paga os erros ou incapacidades dos gobernantes de turno.

A ilusión de todo mosquito sería encontrar un político que:

-Traballase polo ben común e non para satisfacer ambicións persoais, ou asegurarse un posto de traballo agora que hai tanto paro. -Prometese só o que pode cumprir, e cumprise todo o que promete.

-Non esquecese que é só voceiro dos que o votaron para que os representase e non o amo da vida da xente.

-Soubese escoitar todas as opinións e leve a cabo o máis beneficioso para o pobo, votáseno ou non. -Non tivese agradecementos e obrigas especiais (compromisos), para que puidese actuar en liberdade.

-Soubese das necesidades da xente porque non vive dentro da súa propia burbulla.

Serei capaz de encontrar alguén así para o cargo? Por se acaso poño este aviso clasificado:

Búscase político para cubrir cargo de representante do pobo Requisitos:

- Clara vocación de servizo.

- Sen compromisos que non se poidan facer públicos.

- Honestidade comprobable con referencias.

- Idade, non vinculante.

- Estudos, non excluíntes.

- Mobilidade propia (para evitar gastos). - Carné de conducir (para evitar gastos de chófer).

- Idioma oficial bo nivel, co-oficiais valorables (para evitar pagamento tradutores).

- Con declaración de bens persoais antes da toma de posesión do cargo. - Experiencia previa, non imprescindible . - Dispoñibilidade inmediata .

Funcións:

Dirixir, coordinar e aplicar con iniciativa e autonomía as promesas electorais que o levaron ao cargo

Ofrécese:

- Remuneración a convir segundo cumprimento de obxectivos.

- Traslados (en clase turista).

- Dietas (baixas calorías).

- Vestimenta (a cargo persoal, con prohibición de aceptar regalos de firmas de renome).

- Oficina propia (con mobiliario modesto).

Incorporarase a importante proxecto de implantación nacional con duración estimada de polo menos catro anos.

Absterse persoas que non reúnan estes requisitos.

Mandar currículo con foto, o enderezo electrónico desta páxina.

Zzz...Mosquito Capón