GONDOMAR

É o segundo atentado contra unha sede do PP en menos de 24 horas, despois da acción similar sufrida onte na sede de Nigrán

O PP provincial condena o ataque sufrido contra a súa sede de Gondomar e incide en que “os atentados son a voz dos que carecen de razón”

· O presidente provincial do PP en Pontevedra, Rafael Louzán, reiterou que “seguiremos traballando na mesma liña e con máis forza se cabe, porque cremos na defensa lexítima das ideas dos cidadáns”

Partido Popular / Gondomar

O PP provincial de Pontevedra amosou hoxe a súa “máis enérxica condena” ao atentado sufrido esta madrugada na sede de Gondomar, o segundo que se produce en menos de 24 horas contra unha das sedes locais dos populares, despois do rexistrado na madrugada de onte en Nigrán.

O presidente provincial, Rafael Louzán, salientou que “os atentados son a voz dos que carecen de razón”, polo que quixo deixar ben claro que os populares “seguiremos coa mesma liña e con máis forza se cabe, porque cremos na defensa lexítima das ideas dos cidadáns”.

Para o líder do PP provincial, contra os que actúan desde a violencia e a sinrazón, só cabe responder con máis traballo e máis empeño na defensa dunha sociedade libre e democrática.

Louzán reitera a súa “condena a este tipo de ataques que atentan contra a liberdade de expresión” e espera que todas as forzas políticas se sumen a este rexeitamento da violencia.

Así mesmo, o presidente provincial comentou as dificultades que o partido ten á hora de alugar locais nos baixos dos edificios, xa que na maioría dos casos teñen vivendas nas plantas superiores, o que dificulta seriamente a localización das sedes locais. Louzán comentou a importancia das sedes locais en todos os concellos da provincia e incidiu en que, desde a súa chegada á presidencia provincial desta formación, dotar a todas e cada unha das agrupacións locais dos populares dun lugar de traballo foi unha das súas principais apostas.

De feito, neste tempo pasouse de 27 a máis de corenta sedes abertas e o obxectivo e conseguir implantala nos 62 municipios da provincia.

CÓCTEL MOLOTOV

O atentado contra a sede de Gondomar produciuse de forma similar ao rexistrado en Nigrán, dado que os asaltantes romperon tamén a cristaleira exterior para introducir nas oficinas un artefacto incendiario que, neste caso, non ocasionou ningún dano debido a que na área onde caeu non había ningún material susceptible de incendiarse.

Ademais, os autores do asalto lanzaron un segundo cóctel molotov no exterior do local, que tampouco ocasionou danos.