A GUARDA

O BNG lamenta a actitude do grupo de goberno retrasando o pleno sobre a Senda Litoral

“O BNG considera importante que haxa un acordo plenario no que se apoien as reivindicacións dos veciños e veciñas de Fernández Albor”

O portavoz municipal do BNG no concello da Guarda, Xan Lois Lomba, lamenta a actitude do grupo de goberno de esgotar os prazos para a celebración do pleno extraordinario sobre as obras a Senda Litoral solicitado polo conxunto da oposición.

Infogauda / A Guarda

O pasado 8 de marzo os concelleiros da oposición solicitaron a celebración dun pleno extraordinario por petición dos veciños e veciñas da rúa Fernández Albor, na que se solicitaba a revisión da parte do proxecto de Senda Litoral que atinxe a dita rúa. Entre as reivindicacións están a habilitación de prazas de aparcamento ao longo da rúa, lugares para carga e descarga, prazas de aparcamentos para minusválidos e contentores, tamén se solicita aproveitar un amplo espazo na rotonda de Sta. Catalina para destinala á aparcamento dado a falta de prazas unha vez rematado todo o proxecto.

Para o BNG é lamentábel a falta de sensibilidade do Alcalde cos veciños e veciñas da rúa Fernández Albor ao non atender a petición de celebrar un pleno extraordinario para atender as súas reclamacións. Tivo que ser a oposición quen facendo do uso das súas capacidades solicitara a celebración do pleno.

O BNG non entende a intención do grupo de goberno de retrasar o pleno esgotando os prazos marcados pola lei tal e como anunciou na comisión de asuntos plenarios o portavoz municipal do PSOE, Miguel Español, máis aínda cando asegurou que asumían a proposta que se levaba pleno.

O BNG considera importante que haxa un acordo plenario no que se apoien as reivindicacións dos veciños e veciñas de Fernández Albor, facéndolle chegar ao Ministerio de Medio Ambiente y Medio Rural e Mariño a preocupación que existe sobre o desenvolvemento do proxecto neste tramo da Senda Litoral.