GONDOMAR

O IEM presenta un estudo sobre as elites e a loita polo poder no Val de Miñor durante o reinado de Alfonso XIII

• A Aula de Cultura Ponte de Rosas, sede do Instituto de Estudos Miñoráns (IEM) en Gondomar, acollerá este venres, 23 de outubro, ás 20.00 horas, a presentación do libro Votos son triunfos. As elites do Val de Miñor: a loita polo poder durante a monarquía de Alfonso XIII  

Ricardo Rodríguez Vicente/Gondomar

 O historiador e investigador gondomareño José Luis Mosquera Veleiro publica unha nova obra centrada nas elites políticas e sociais da comarca miñorana a comezos do século XX.  

 A Aula de Cultura Ponte de Rosas, sede do Instituto de Estudos Miñoráns (IEM) en Gondomar, acollerá este venres, 23 de outubro, ás 20.00 horas, a presentación do libro Votos son triunfos. As elites do Val de Miñor: a loita polo poder durante a monarquía de Alfonso XIII, unha nova achega editorial de José Luis Mosquera Veleiro, veciño de Gondomar.

 A publicación, integrada na colección Universitas Minoris do IEM e editada coa colaboración dos tres concellos do Val de Miñor, afonda nas dinámicas de poder político e social da comarca durante as primeiras décadas do século XX, cunha atención especial aos grupos dirixentes locais e ás loitas polo control das institucións municipais.  

 O libro conta cun limiar de Anxo Rodríguez Lemos, veciño de Baiona, membro do IEM, doutor en Historia pola Universidade de Santiago de Compostela e cronista oficial da vila de Baiona, de Miñor.  

 O traballo analiza as elites miñoranas, entendidas como aqueles sectores que ocupaban posicións de poder nos concellos, tanto desde o goberno como desde a oposición, e que participaban activamente na dirección dos partidos políticos e na presentación de candidaturas electorais. Trátase, polo tanto, dunha aproximación aos protagonistas da vida política local e aos mecanismos que condicionaban o acceso e o exercicio do poder.

 A propia prensa da época ofrece testemuños sobre a consideración social destes grupos. En outubro de 1906, o xornal católico El Noticiero de Vigo referíase a eles como «Los elementos más valiosos de la localidad». Unha expresión que reflicte a percepción das elites como os sectores máis destacados da sociedade, pero que tamén permite achegarse ao papel que desempeñaban na organización da vida pública.  

 O estudo sitúase na segunda etapa da Restauración borbónica, un período que coincide practicamente coa totalidade do mandato constitucional de Alfonso XIII. O marco cronolóxico abrangue desde a aprobación da nova Lei Electoral, o 8 de agosto de 1907, ata o golpe de Estado do xeneral Miguel Primo de Rivera, o 13 de setembro de 1923, que puxo fin a esta etapa do sistema político da Restauración.  

 Con esta obra, José Luis Mosquera Veleiro contribúe ao coñecemento da historia contemporánea do Val de Miñor, poñendo o foco nas persoas, nos grupos e nas relacións de poder que marcaron a política municipal durante un período de importantes transformacións na vida política española. A publicación súmase así ao labor de investigación e divulgación histórica impulsado polo Instituto de Estudos Miñoráns, coa colaboración das administracións locais da comarca.