A GUARDA

Pablo Álvarez Álvarez recibe o recoñecemento da AGASP por máis de 35 anos de servizo na Policía Local da Guarda  

O presidente da Xunta de Galicia, Alfonso Rueda Valenzuela, con Pablo Álvarez Álvarez e Óscar Álonso Álvarez, na  Academia Galega de Seguridade Pública (AGASP) 

Pablo Álvarez Álvarez amosando as distincións recibidas polos seus máis de 35 anos de servizo

Fotos: CAG

Infogauda/A Guarda

 O policía local da Guarda Pablo Álvarez Álvarez vén de ser distinguido pola Academia Galega de Seguridade Pública (AGASP) en recoñecemento aos seus máis de 35 anos de servizo.  

 Esta distinción recoñece unha dilatada traxectoria profesional dedicada á seguridade cidadá e ao servizo da veciñanza, cun labor continuado ao longo de máis de tres décadas e media na protección e atención dos veciños e veciñas da Guarda.  

 Pablo Álvarez estivo acompañado durante o acto polo tenente de alcalde, Óscar Alonso Álvarez, que compartiu con el este momento de recoñecemento á súa carreira profesional.

 Desde o Concello da Guarda trasladáronlle os seus parabéns por esta distinción, así como o agradecemento pola súa dedicación, profesionalidade e compromiso ao longo de todos estes anos.  

 O recoñecemento concedido pola AGASP constitúe unha ocasión para destacar o valor do traballo desenvolvido pola Policía Local e a importancia da súa contribución diaria á seguridade, á convivencia e ao benestar da cidadanía.  

 O Concello da Guarda quere agradecer publicamente a Pablo Álvarez Álvarez os seus máis de 35 anos de servizo á vila e felicitalo por este merecido recoñecemento á súa traxectoria profesional.