DEPORTES

IX TORNEO 3X3 VILA DA GUARDA

A GUARDA REUNIRÁ O MELLOR BALONCESTO 3X3 NUNHA XORNADA QUE COMBINARÁ DEPORTE, MÚSICA E ACTIVIDADES FAMILIARES

•  O Centro Cultural da Guarda acollerá o vindeiro 25 de xullo a novena edición do torneo organizado polo club BMB Baixo Miño.

•  A programación inclúe sesión vermú, actuacións de danza, música en directo e actividades infantís ao longo de todo o día.

•  O prazo de inscrición para os equipos participantes permanecerá aberto ata o 19 de xullo con prazas limitadas.

O alcalde de A Guarda con membros da organización do evento

Foto: CAG

Infogauda/A Guarda 

 O vindeiro 25 de xullo, as pistas do Centro Cultural da Guarda converteranse no epicentro do baloncesto urbano coa celebración do IX Torneo 3x3 Vila da Guarda. O evento, organizado polo club @bmb_baixominobasket, consolídase un ano máis como unha das citas deportivas e de lecer máis agardadas do verán no Baixo Miño, destacando polo seu continuo crecemento en participación e afluencia de público.

 A xornada non só ofrecerá competición deportiva de alto nivel, senón que se articulará como unha auténtica festa para persoas veciñas e visitantes. A organización deseñou un completo programa cultural e recreativo para dinamizar o día. Entre as propostas destacan a música de Afrokinki Crew, unha sesión vermú a cargo de Dr. Flaming, e a actuación especial da Escola de Danza Attitude xusto antes da disputa da gran final. O recinto disporá tamén de actividades específicas para a cativada, sorteos, concursos e servizo de barra, cun enfoque claramente orientado ao desfrute familiar.

Inscricións abertas e prazas limitadas

 A organización mantén aberto o proceso de inscrición para todos aqueles equipos que desexen competir. O prazo rematará o vindeiro 19 de xullo ou ben no momento no que se completen as 12 prazas dispoñibles para a competición.

 Os equipos deberán estar integrados por 4 ou 5 xogadores/as, e a cota de inscrición fixouse en 60 euros por formación. As persoas interesadas en formalizar a súa participación ou solicitar máis detalles poden poñerse en contacto co club organizador a través do seu perfil oficial en redes sociais (@bmb_baixominobasket).