DEPORTES

PIRAGÜISMO

O TEIXUGO MANU OCHOA CAMPIÓN DE ESPAÑA DE CAIAC CROSS 

 

Manu Ochoa, campión de España de caiac cross

Informa (fotografías e redacción): Rosa Fernández Carrera

 Do 6 ao 8 de setembro os mellores palistas de slálom español déronse cita no Parc Olimpic do Segre para celebrar os Campionatos de España de Slálom e de Caiac Cross. 

  O Campionato de Caiac Cross, comezou na tarde do sábado coa contra reloxo que determina os emparellamentos e orde de saída dos enfrontamentos e rematou na mañá do domingo cos cuartos, semifinais e finais. Dos trinta deportistas que tomaron a saída só os dezaseis mellores tempos acadaban praza para a seguinte rolda.  

 Nesta modalidade participaron Luís Fernández e Manu Ochoa. Os dous acadaron praza en cuartos de final, Luís ao rematar co sétimo mellor tempo, e, Manu, gañando con claridade a proba nunha baixada espectacular e rapidísima. O domingo Luís caeu en cuartos de final ao entrar terceiro da súa serie, rematou a proba en noveno lugar. Pola súa banda, Manuel gañou claramente as tres series, cuartos, semifinais e finais, moi por diante de tódolos seus contrincantes, proclamándose campión de España desta modalidade, que cada vez conta con máis seguidores. 

Manu Ochoa nun momento da súa brillante actuación no Campionato de España de Caiac Cross

Manu Ochoa- no centro do podio - xunto co segundo e terceiro clasificado, no Campionato de España de caiac cross

 Este dobre campionato iniciouse  co slálom. Venres celebráronse as clasificatorias e o sábado de mañá as semifinais e finais. O club Deportivo Miño levou tan só tres deportistas ao evento, e a pesares de ter opcións a medalla e realizar unha boa actuación, viñeron de baleiro. 

  

Luís Fernández, participou en C1 sénior

Brais Castro nun momento da súa participación en C1 sénior

 Brais Castro, en C1 sénior, conseguiu na tarde do venres o seu paso a semifinais e o sábado quedou fóra de finais por moi pouco, rematando undécimo.  

 Luís Fernández, tamén en C1 sénior, o venres gañou as clasificatorias cunha baixada espectacular, superou as semifinais co cuarto mellor tempo, e, xa nas finais, fixo unha gran baixada, que o colocaban no segundo lugar, pero unha penalización máis que dubidosa, relegárono finalmente ao décimo lugar.  

 Manuel Ochoa, en K1 sénior, tamén superou clasificatorias e semifinais nos postos de cabeza, e, na final, fixo unha gran baixada sen penalizacións, rematando cuarto.  

 Remata o Campionato de España, última e máis importante competición da Liga Española de Slálom sen medallas para os teixugos, pero demostrando nas distintas mangas que están entre a elite do slálom español.  

 Tanto Luís como Manu parten esta semana cara a Ivrea onde disputarán unha Copa do Mundo. Luís en canoa, e Manu en caiac e en cross.