GONDOMAR

Eureka Reto Rural convidará ao público a conectar coa historia e patrimonio de Gondomar 

O concello acolle a oitava proba desta iniciativa de EuRural e Xeodestino Ría de Vigo e Baixo Miño, que terá ‘O Conde no Camiño’ como temática central 

Será o sábado 6 de xullo ás 10.30 h. Inscricións xa abertas na web 

Infogauda / Gondomar

 O público continúa coñecendo o territorio dos 14 concellos do territorio de EuRural e Xeodestino Ría de Vigo e Baixo Miño desafío a desafío. ‘O Conde no Camiño’ será a temática central dunha nova cita do proxecto Eureka Reto Rural, un produto turístico orixinal que nesta ocasión permitirá a todas e todos os participantes achegarse á historia e patrimonio de Gondomar dun xeito divertido e interactivo a dun escape room ao aire libre, dixital, de balde e para todos os públicos. 

 O sábado 6 de xullo o Concello de Gondomar acollerá un encontro que permitirá seguir os pasos de Diego Sarmiento de Acuña, conde de Gondomar. Un percorrido que permitirá coñecer un pouco máis a este histórico personaxe visitando lugares únicos que manteñen viva a tradición e a cultural local, infraestruturas, monumentos ou construcións emblemáticas da vila. 

 O xogo de escapismo partirá ás 10.30 h da praza Rosalía de Castro para desfrutar dunha ruta circular de dificultade moderada. As persoas que desexen participar deberán inscribirse de forma individual a través do formulario habilitado na web do Xeodestino Ría de Vigo e Baixo Miño e acudir ao punto de encontro. Todas e todos os menores de 12 anos deben ir acompañados dunha persoa adulta. Para as persoas que non poidan desfrutar desta experiencia o día do estreo, o xogo de escapismo permanecerá aberto ao público durante un mes a través da web do Xeodestino Ría de Vigo e Baixo Miño.  

 A presidenta de EuRural, Sandra González, convida a todo o público a sumarse a esta nova aventura de Eureka Reto Rural, “unha oportunidade única de mergullarse na rica historia de cada un dos concellos do territorio, unha experiencia educativa e turística que permite a todas e todos os participantes vivir a historia dun xeito interactivo e emocionante  e descubrir o encanto que agochan todos os nosos municipios”.  

 O alcalde de Gondomar, Paco Ferreira, sinalou “a importancia da posta en valor do noso patrimonio, cultural, arquitectónico e histórico, que grazas a esta iniciativa poderase facer dende un punto de vista lúdico e que permitirá achegarse a unha figura tan importante para a nosa vila como Diego Sarmiento de Acuña, primeiro Conde de Gondomar. Polo tanto, quero animar a toda a cidadanía a participar e coñecer un pouco máis da nosa historia”. 

 O equipo gañador do xogo de escapismo de Gondomar poderá desfrutar dunha saída na embarcación tradicional ‘Piueiro’ con visita guiada coas redeiras de A Guarda e degustación de produtos típicos con sabor a mar. Ademais, o Concello de Gondomar sorteará un lote de produtos galegos de Alimentación María valorado en 150 euros.  

 Tras Gondomar, as seguintes datas, concellos e temáticas dispoñibles serán: 

- 12 de xullo. O Rosal. ‘O sector vinícola’. 

- 14 de xullo. Fornelos de Montes. ‘Festa gastronómica da carne do Suído e da Chanfaina’. 

- 20 de xullo. Tomiño. ‘Camiño da Nosa Señora do Norte’. 

- 27 de xullo. Pazos de Borbén. ‘A emigración: As casas indianas’. 

- 14 de agosto. Soutomaior. ‘María Vinyals’. 

- 20 de setembro. Redondela. ‘A historia da nosa vila’. 

 Toda a información pormenorizada das actividades, con horario e puntos de encontro están dispoñibles na web do Xeodestino Ría de Vigo e Baixo Miño.