OIA

Oia acolleu o I Campionato Galego de Parapente Precisión  

• Celebrado a pasada fin de semana

  

A alcaldesa de Oia e o concelleiro de Deportes, con membros do Club Planeamos, e participantes no I Campionato Galego de Parapente Precisión

Foto: C.O. 

Infogauda / Oia

 Oia acolleu a pasada fin de semana o I Campionato Galego de Parapente Precisión, organizado polo Club Planeamos, co apoio da Federación Galega de Aeronáutica (FAG) e a colaboración do Concello.  

 A competición desenvolveuse co obxectivo de promover, promocionar e incentivar o voo libre en parapente e estivo dirixida a pilotos licenciados pola Federación. Contou con dúas categorías de voo monopraza, unha xeral e outra feminina.   

 As persoas participantes despegaron desde o alto da montaña, na zona noroeste, e dirixíronse cara a diana situada na Estrada Vella, preto do Mosteiro de Oia, nunha contorna de beleza incomparable.  

 A competición contou con altas doses de emoción, así como de amplas demostracións de destreza e habilidade por parte dos e das pilotos en liza. Neste sentido, cabe destacar a exactitude á hora de calcular a caída, procurando aterrar xusto no punto onde estaba a diana. De feito, a precisión na aterraxe foi o factor determinante na avaliación de cada un dos voos.  

 Así as cousas, a clasificación quedou do seguinte xeito:  

XERAL: 

1º.- Xulio Villarino (Club Parapente Ferrol). 

2º.- Diego Jalda (Club Parapente La Térmica). 

3º.- Diego Pimentel (Club Nortada).  

FEMININA: 

1ª.- Vanessa Feal (Club Parapente Ferrol). 

2ª.- Mela Rodríguez (Club Parapente Ferrol).  

 A entrega de trofeos contou coa presenza do presidente da FAG, Miguel González; a alcaldesa de Oia, Cristina Correa; e o concelleiro de Deportes, Modesto Pereira.  

 Na súa primeira edición, a actividade contou con moi boa acollida de participantes e tamén de público, que puido observar as habilidosas manobras dos deportistas e gozar da paisaxe oiense, dominada polo contraste entre o mar e a montaña. O Concello agarda que esta competición se consolide no calendario anual e que Oia siga a ser un destino referente nesta práctica deportiva.