A GUARDA

O Centro San Xerome celebrou a xornada de peche do Proxecto “San Xerome Dixital”  

A xornada de peche do proxecto tivo lugar no Recreo Artístico Guardés, onde se entregaron os diplomas de participación

Foto: C.S.X.

Infogauda / A Guarda

 Desde decembro de 2022, o Centro San Xerome desenvolveu o proxecto  “San Xerome Dixital”, no que 12 persoas con diversidade intelectual, residentes na comarca do Baixo Miño, formáronse durante 4 meses en competencias dixitais, adquirindo coñecementos básicos de informática e competencias tecnolóxicas básicas, creación de blogues e redes sociais, creación e xestión da marca persoal en redes sociais, seguridade na contorna dixital, así como contidos relacionados coas habilidades sociais, comunicación, intelixencia emocional e traballo en equipo.   

 Durante este tempo, os participantes superaron con gran éxito un total de 195 horas de formación teórica que lles dotaron de habilidades e competencias que favorecen os seus coñecementos nun ámbito tan actual como son as novas tecnoloxías e redes sociais. Ademais, estas destrezas adquiridas con tanto esforzo contribúen a mellorar as súas posibilidades de inserción socio laboral.   

 Durante a mañá do mércores 15 de marzo celebrouse a xornada de peche do proxecto. O evento tivo lugar no Recreo Artístico Guardés, onde se entregaron os diplomas de participación, que certifican o bo aproveitamento da formación por parte de todas as persoas participantes.   

 Ademais da entrega de diplomas, durante esta xornada tivo lugar un espazo de reflexión onde todas as persoas implicadas puideron expoñer e compartir a súa experiencia tras formar parte desta iniciativa tan enriquecedora. 

 O proxecto foi financiado pola Fundación ONCE a través do programa Por Talento Dixital.