CULTURA

Gran éxito de participación do Concurso Escolar de Entroido 2022       ·         

Máis de 500 fotografías enviadas de 308 centros educativos de toda Galicia participaron no sorteo celebrado o 7 de marzo  

· Un total de 20 centros educativos de Galicia recibirán nos próximos días os agasallos do sorteo e o seu diploma de participación

Teresa Rocamonde / Santiago de Compostela 

 O Concurso Escolar de Entroido para centros de infantil e primaria de toda Galicia posto en marcha polos Bolechas e Grelo Comunicación foi todo un éxito. Desde o luns 21 de febreiro ata o venres 4 de marzo recibíronse algo máis de 500 fotografías de 308 centros educativos diferentes, desde escolas de infantil, ata centros rurais, colexios de primaria e secundaria e mesmo centros de educación especial.

 O interese pola proposta quedou de manifesto tamén no aumento do tráfico rexistrado na web dos Bolechas, máis dun 200% durante o transcurso do concurso, e tamén nas redes sociais, onde se acadaron máis de 1.500 impactos. Asemade, rexistráronse un total de 1539 descargas da Unidade Didáctica do Entroido de Galicia e máis de 4000 das diversas actividades que se puxeron a disposición dos centros educativos e de toda a cidadanía.

 O éxito de participación confirma o desexo de recuperar esta festa tan nosa que é o entroido, e que sempre tivo moita acollida entre a cativada galega. De feito, moitos colexios aproveitaron a Unidade Didáctica e o material aportado nesta iniciativa para traballar o entroido e mesmo mandaron fotos relacionadas co traballo nas aulas deste material didácticos.

 Desde fotos individuais ata clases enteiras disfrazadas, carteis, máscaras, materiais elaborados para os disfraces, pasacalles, aulas engalanadas para o entroido… todo tivo cabida nas fotos do Concurso, demostrando unha vez máis o gran traballo que leva a cabo o profesorado de Galicia no día a día das aulas.

 Algunhas das fotos foron publicadas nas redes sociais dos Bolechas –a enorme cantidade de material recibido fixo imposible publicar todo– pero todas as participacións recibiron un diploma e entraron no sorteo de 20 fantásticos agasallos, entre os que hai material informático, discos dos Bolechas e lotes de libros da popular familia.

 O luns 7 de marzo realizouse o sorteo e o día 8 publicáronse na web dos Bolechas e nas redes sociais os títulos das fotografías que resultaron gañadoras. Así mesmo, contactouse cos colexios para informalos de que foron agraciados e anunciarlles o envío dos agasallos.

Lista completa de premiados no sorteo

 "Entroido dos bolechas" da clase 1.º de primaria do CEIP Mariñamansa; "Que treman os malvados!" de 5.º de infantil do CEIP Ramon Otero Pedrayo do Barco de Valdeorras; "Despois de moitos anos, as vacas volven ás rúas de Pazos” do CRA Monterrei; “Pasiño a pasiño facemos o Camiño” de 1.º B de primaria do CPI Cernadas de Castro de Lousame; “O entroido” do Centro de Educación Especial Nosa Señora do Rosario da Coruña; "As nosas cereixiñas" de 3 anos A do CEIP plurilingüe Xoan de Requeixo de Chantada; “Entroidando con Rosalía” de 5.º de infantil do CEIP A Pedra de Bueu; "Peliqueiros de Nigrán" do CEIP Carlos Casares de Vilariño; “Os rockeiros de 5º de infantil” do CEIP Manuel Rivero de Lalín; "Peregríns do mundo por Brens: Peregríns de Brens polo camiño" do CEIP A Igrexa-Brens de Cee; “Lendas de Galicia: Pepa A Loba” de 6.º de infantil do CEIP de Esteiro en Ferrol; “O mar” do CEIP Campanario, Porto do Son; “Mariñatur. Concello de Cervo” de 4.º de primaria do CEIP Fondo Nois de Foz; "Érase unha vez" da EEI de Vilalba; "Os trasnos do refugallo” da Escola Infantil Municipal de Arteixo; “Festa dos choferes do Concello de Alfoz” de 4.º de infantil do CEIP Fondo Nois; “Condutores que se dirixen ao Rosal visitar o Galo Gonzalo e a Ola Manola” de 4.º de infantil do CEIP Mestre Valverde Mayo; "A diversidade de estilos musicáis, únenos” de 3.º primaria do Colexio Atalaya Cantabria e “Entroidos de Galicia” do CRA de Meis.