O BNG LAMENTA A FALTA DE PROXECTO PARA A PRAZA DE ABASTOS DA GUARDA
Anxo Lois Baz Vicente (concelleiro portavoz do Grupo Municipal do BNG): “A ausencia de proxecto do goberno municipal do PSOE lévaos a ir dilapidando recursos, facendo remendo sobre remendo, sen un proxecto global para camiñar cara a un mercado de excelencia”
Infogauda / A Guarda
“No mes de maio do 2020 o BNG levou ao pleno do Concello da Guarda a proposta de elaboración dun proxecto de reforma integral da Praza que nos permitira optar ao recoñecemento de mercado de excelencia por parte da Xunta de Galiza. A nosa proposta foi aprobada”. Dese xeito relembra Anxo Lois Baz Vicente, concelleiro portavoz do Grupo Municipal do Bloque Nacionalista Galego, no Concello de A Guarda, a iniciativa presentada polo BNG en relación ao mercado municipal.
“Meses despois - engade o voceiro nacionalista - o grupo de goberno do PSOE, facendo caso omiso do acordo plenario, anunciou a reforma do pavimento da parte superior, un acceso a terraza e a mellora dun posto por un importe total de 40.000 €. Nese momento o BNG cualificou este anuncio como un remendo máis que desvirtuaba radicalmente o acordo plenario comprometendo un proxecto de futuro para a Praza”.
BARREIRAS ARQUITECTÓNICAS E REMENDOS
“A falta de criterio e a improvisación - resalta Baz Vicente - chegan ao extremo de que o acceso a terraza presenta barreiras arquitectónicas”.
Asemade, Anxo Lois Baz afirma que “desde o ano 2013 os parcheos realizados na Praza de Abastos superan os 332.000€. O grupo de goberno do PSOE nunha recente comparecencia nos medios de comunicación volve anunciar unha nova reforma “estética” por valor de 100.000 €.
Sen dúbida con estas inversións racionalizadas, cun proxecto ben definido, que simplemente non existe, a Praza podería dar un salto cualitativo. Cunha cuantía non moi superior Tomiño logrou un mercado de excelencia e o Rosal cunha inversión bastante menor vai camiño del”.
Finalmente, o portavoz municipal do BNG Anxo Baz manifestou: “A ausencia de proxecto do goberno municipal lévaos a ir dilapidando recursos, facendo remendo sobre remendo, sen un proxecto global para camiñar cara a un mercado de excelencia. As consecuencias están a vista, lonxe de dinamizar a praza en vez de abrirse postos pecháronse varios”.
Ningún comentario:
Publicar un comentario