LABORAL

Persoal do Banco Sabadell mobilizarase en Vigo 

Contra os despidos e o peche de oficinas previstos pola entidade 

Infogauda / Vigo

 Os sindicatos con representación no Banco Sabadell convocan este xoves 30 unha mobilización  conxunta nas dúas das oficinas de Vigo (na da rúa Colón 26 ás 11:00 horas e na de Policarpo Sanz 3  ás 11:30 horas) para rexeitar a pretensión da entidade de despedir a 1.936 persoas e pechar o 38%  das oficinas en Galiza.  

 Seguindo o camiño marcado por outras entidades, o Banco Sabadell, que xa no primeiro trimestre  deste ano se desfixo de 1.800 traballadoras/as, agora presentou un ERE ara despedir en todo o  Estado a 1.936 persoas máis. As xustificacións, segundo explica o secretario da sección sindical da  CIG, Andrés Río, son iguais que as dos demais. De feito, quen asesora ao banco é o mesmo bufete de avogados/as especialistas en despedimentos no sector financeiro. 

 Entre outras cuestións a entidade alega a maior dixitalización da clientela, que cualifican de “forzada  e inmoral”, para a que aproveitaron a situación de pandemia que vivimos desde o ano 2020, cando,  afirman, “a clientela o que demanda é atención presencial”. Como demostración Río apunta as  longas colas e a sobrecarga de traballo que se acumula nas oficinas. “Expulsan á clientela das  oficinas para xustificar despedimentos”, lamentan. 

 Xunto a isto explican que o banco di que ten unha baixada de marxes e de rendibilidade, “mentres  acribillan a comisións ás e aos clientes e restrinxen servizos, ao tempo que declaran beneficios de  220 millóns de euros no primeiro semestre deste ano, un 51% máis que o ano pasado”. Por iso  consideran que “a única meta do Banco Sabadell é repartir un dividendo do 30% do beneficio ao seu  accionariado”. 

Redución de custos de persoal 

 Para a sección sindical da CIG, o que buscan é reducir custos, mais reducindo só os custos de persoal, que é quen produce os beneficios. 

 Nese sentido apuntan a contradición de terse a entidade desfeito de 1.800 persoas a principios deste ano para contratar a 200 persoas despois “porque non daban feito co traballo”. Isto xunto coa  contratación dunha decena de colaboradores con salarios millonarios para reorganizar a cúpula  directiva e a quen sinalan como “fichaxe estrela”, César González-Bueno, ao que acusan de estar “á  fronte desta nova desfeita de despedimentos”. 

 Diante disto, as centrais sindicais elaboraron un calendario de mobilizacións que comezou o pasado  xoves 23 e que mañá terá continuidade en Vigo: 

XOVES 30 SETEMBRO – VIGO: 

*Concentración ás 11:00h en Colón 26 e ás 11:30h en Policarpo Sanz 3. 

LUNS 4 OUTUBRO – en todas as oficinas: 

*Paro de 15 minutos, de 10:00h a 10:15h. 

MARTES 5 OUTUBRO – en todas as oficinas: *Paro de 60 minutos, de 10:00h a 11:00h. 

MÉRCORES 6 OUTUBRO: 

*FOLGA 24 horas, con MANIFESTACIÓN NA CORUÑA, que sairá as 11:30h dende a O.P. do  Cantón Grande nº 6. 

VENRES 8 OUTUBRO: 

*FOLGA 24 horas, con MANIFESTACIÓN EN COMPOSTELA, que sairá as 11:30h dende a  oficina da Rúa do Hórreo 33.