A GUARDA

O BNG esixe solucións á falta de seguridade viaria na Pasaxe, en Camposancos  

Anxo Lois Baz Vicente (voceiro municipal do BNG no Concello de A Guarda): “É moi preocupante ver como o goberno local non atende ás demandas que veciños e veciñas reclaman dende hai anos”

 

           Anxo Lois Baz Vicente, voceiro municipal do BNG no Concello de A Guarda
  

Infogauda / A Guarda

 O voceiro municipal do Bloque Nacionalista Galego no Concello de A Guarda, Anxo Lois Baz Vicente vén de comunicar que realizaron “unha visita á Pasaxe, en Camposancos, ante a desesperación de veciños e veciñas pola falta de medidas de seguridade viaria na zona”.  

 Na reunión mantida coa veciñanza, “o Bloque Nacionalista Galego faise eco dunhas demandas que non van máis aló duns mínimos de dignidade e seguridade: unha marquesina, un paso de peóns e medidas para o calmado de tráfico”.  

 O BNG denuncia “a situación de precariedade na que o goberno local deixa a numerosas familias, usuarias do transporte público, por negarlles a simple colocación dunha marquesina”.  

 “A ausencia dun mínimo espazo de abrigo, condea aos nosos nenos e maiores a padecer as inclemencias do tempo un inverno máis”, afirma o voceiro nacionalista Anxo Lois Baz.  

 Para os nacionalistas, “é moi preocupante tamén ver cómo o goberno local non atende a colocación dun paso de peóns e as necesarias medidas de calmado de tråfico que se solicitan desde hai anos”.  

 “Temos a parada de autobús, a estación marítima, o parque infantil, un clube náutico, o enlace do Camiño portugués pola costa, o servicio de ferri, as docas, …, todo frente a casa e non temos por onde cruzar”, comentaba unha das veciñas.  

 “O BNG quere amosar todo o seu apoio ás demandas que a veciñanza reclama ao Concello da Guarda, demandas, ás que tamén se sumou a presidenta da E.L.M de Camposancos, Merchi Martínez”, afirmou Anxo Lois Baz. 

 Fontes do BNG afirmaron a este xornal dixital transfronteirizo que “tanto a alcaldesa pedánea, como o portavoz municipal Anxo Lois Baz, comprometéronse ante os veciños da Pasaxe a esixir unha actuación urxente que cubra unhas necesidades máis que constatadas, se atendemos a carga de tráfico e as velocidades que soporta unha estrada que da tamén acceso ás praias, astaleiros, fábricas, naves e almacéns e unha ampla zona residencial”.