VILA DE CRUCES

Valentín García participa na ofrenda a Xosé Neira Vilas polo cuarto aniversario do pasamento do escritor

O secretario xeral de Política Lingüística da Xunta, Valentín García, acompañado por  Fernando Redondo, presidente da fundación depositaria da obra de Xosé Neiras Vilas e continuadora do seu legado, na ofrenda floral de hoxe

Infogauda / Vila de Cruces (Pontevedra)

 Con motivo do cuarto aniversario do falecemento de Xosé Neira Vilas, ocorrido o 27 de novembro de 2015, o cemiterio parroquial de Gres, no que repousan seus restos mortais, acolleu hoxe unha ofrenda na que participou o secretario xeral de Política Lingüística da Xunta, Valentín García, acompañado polo presidente da fundación depositaria da súa obra e continuadora do seu legado, Fernando Redondo, os integrantes do padroado e alumnado do CEIP estradense do Foxo. 

 Xosé Neira Vilas foi en vida e segue sendo, sen dúbida, un dos clásicos da literatura galega, na que destacou como autor inaugural da literatura infantil e xuvenil con Memorias dun neno labrego (a novela galega que contabiliza máis reedicións e traducións ata os nosos días). Deu ao prelo máis de 60 obras e exerceu de infatigable colaborador de prensa, así como de impulsor e colaborador asiduo de múltiples actividades de interese fundamental para lingua e para a cultura propias de Galicia.