A GUARDA

Xa se poden recoller as entradas

Para as dúas obras de teatro do Nadal e o espectáculo do Apalpador 

Infogauda / A Guarda

 O Concello da Guarda ofertará dúas obras de teatro na Axenda de Nadal 2018/19 coas funcións do teatro para nenas/os «Tristán» o vindeiro xoves 27 de decembro ás 17:30 horas no Centro Cultural e do teatro-clown musical para adultos «Route 66» o venres 28 de decembro ás 21:00 horas no Centro Cultural, e o sábado 29 co espectáculo do Apalpador, tamén no Centro Cultural.  

 O xoves 27 de decembro ás 17:30 horas o Centro Cultural acolle a sesión de teatro “Tristán” a cargo da compañía Elegante Elefante. As entradas están dispoñibles dende o 17 de decembro no Centro Cultural. 

 “Tristán” é un espectáculo visual dirixido ao público infantil dos 3 aos 12 anos. Trátase dunha comedia xestual interpretada ao estilo dos debuxos animados onde as palabras se transforman en xestos e os personaxes falan nunha lingua inventada que é inmediatamente descifrada polo público e a música acompaña o ritmo dinámico da acción.  

 O venres 28 de decembro ás 21:00 horas o Centro Cultural acolle a sesión “Route 66” de Teatro-Clown musical para adultos de Blues Grampas, unha compañía de teatro en clave de clown musical composta por dous recoñecidos actores de longa traxectoria e experiencia no panorama escénico galego: Juanillo Esteban  e Carlos Sante. 

 O sábado 29 de decembro ás 12:00 horas o Centro Cultural será o escenario dunha visita moi especial para os nenos nesta tempada de Nadal: “O Apalpador”. Neste espectáculo, para público familiar a partires dos 3 anos, creado a partir da tradición popular, un carboeiro que se alimentaba unicamente dos froitos do seu castiñeiro e que as xentes chaman o Apalpador, conta aos miúdos porque no Nadal reparte castañas as nenas e nenos que non teñen nada nas súas barriguiñas.   

 A recollida de entradas para ámbalas dúas obras de teatro e para a visita do Apalpador poderá facerse xa dende este luns día 17 de decembro no Centro Cultural da Guarda.