A GUARDA

Joaquín Miguel Villa Álvarez presenta na Guarda un novo traballo de investigación

“Hospital Casa-Asilo de A Guarda(1918-2018), Centenario de una institución benéfica nacida en Puerto Rico”

· Este venres 29 de xuño, ás 20:30 horas, no salón de actos do Centro Cultural da Vila

Infogauda / A Guarda

 O salón de actos do Centro Cultural da Guarda acollerá o venres día 29 de xuño, ás 20:30 horas, a presentación do libro “Hospital Casa-Asilo de A Guarda(1918-2018), Centenario de una institución benéfica nacida en Puerto Rico”, da autoría do activo historiador local Joaquin Miguel Villa Álvarez.  

 Nesta presentación, Joaquín Miguel Villa explicará aos presentes o traballo de investigación da xénese e historia do Hospital Casa-Asilo da Guarda, emblemático edificio, que alberga hoxe as instalacións do Centro Cultural na Rúa Rosalía de Castro, no centenario da comisión que se formou en Puerto Rico para a súa construción.  

 Joaquín Miguel Villa Álvarez é Doutor en Historia Contemporánea pola Universidade de Santiago de Compostela e centrou gran parte do seu traballo na investigación dos movementos migratorios entre A Guarda e diversos países de América Latina, que o levou a publicación de varios libros e ensaios esta temática.  

 O libro “Hospital Casa-Asilo de A Guarda(1918-2018), Centenario de una institución benéfica nacida en Puerto Rico” examina máis polo miúdo como foi o proceso de formación dunha xunta organizadora no ano 1918 en Puerto Rico, encargada da obtención dos recursos económicos para a construción dun Hospital na Guarda, dada a necesidade destas instalacións sanitarias na vila e da existencia de moitas familias necesitadas e con poucos recursos, que non tiñan opción dunha atención médica de calidade.   

 En palabras de J. Miguel Villa, este edificio é “un legado de patrimonio para A Guarda” e un “símbolo da emigración”. 

 Dende o Concello da Guarda convídase a todo aquel que desexe coñecer como foi este fito da historia da nosa vila a que participe nesta presentación, na que ademais contarase cunha sorpresa a cargo dos Quinquilláns.