O MUSEO DO MAR DA GUARDA ACOLLE DESDE ESTE SÁBADO A MOSTRA DA DEPUTACIÓN “SUSTENTABILIDADE EN FEMININO: ACHEGAS DAS MULLERES Á SUSTENTABILIDADE DO MAR”
A exposición, promovida pola Deputación de Pontevedra e a Universidade de Vigo, poderá visitarseata o vindeiro 31 de xullo no museo guardés
Infogauda / A Guarda
Este sábado 30 de xuño ás 12.00 horas inaugurouse no Museo do Mar da Guarda a exposición “Sustentabilidade en Feminino: Achegas das Mulleres á sustentabilidade do mar”, que visita a vila do Baixo Miño tras ter pasado por Ourense, Vigo e Pontevedra. Así, ata o vindeiro 31 de xullo, as persoas interesadas en coñecer a participación e o papel da muller no mundo do mar poderán visitar a mostra no Museo do Mar da Guarda.
“Sustentabilidade en feminino” chega a vila do Baixo Miño tras paso polo Campus de Ourense, o Campus de Vigo e o de Pontevedra. De feito, foi neste último Campus da Universidade de Vigo e da man da directora do proxecto, María Álvarez Lires, onde xurdiu a idea de impulsar unha exposición para visibilizar o papel da muller e a súa contribución na economía do mar, poñendo en valor o traballo que as mulleres desenvolveron ao longo dos séculos en relación co mundo marítimo.
A mostra, que poderá verse no Museo do Mar da Guarda está composta por vídeos, fotografías de redeiras, de mariscadoras, de vendedoras de peixe, de mulleres salgando ou conservando, científicas como a oceanógrafa Ángeles Alvariño ou a que fora directora do Instituto Español de Oceanografía Aida Fernández.
“Sustentabilidade en feminino: achegas das mulleres á sustentabilidade do mar” recolle tamén imaxes, moitas delas inéditas, que serven para recuperar nas aulas o invisibilizado saber das mulleres do mar e promover a igualdade e a acción positiva entre os futuros profesionais e científicos.
A exposición, que poderá ser visitada polo público xeral, estará aberta todos os días da semana de 11:00 a 14:00 horas e de 18:00 a 21:00 horas.
Ningún comentario:
Publicar un comentario