GALICIA

Santiago de Compostela recibiu o pasado ano 262.515 peregrinos, case 25.000 máis que en 2014 

O 53,38% dos camiñantes que recibiron a compostela en 2015 foron estranxeiros 

Despois de España, o país do que procederon mais peregrinos no ano 2015 foi Italia, superando a cifra dos 20 mil peregrinos, seguida de Alemaña, Estados Unidos, Portugal, Francia e o Reino Unido 

O Camiño Francés, con máis de 172.000 peregrinos, o 65,62% do total, foi a ruta máis concorrida

Grupo de peregrinos facendo o Camiño Portugués pola Costa ou Monacal, unha das rutas xacobeas máis atractivas. 

Foto: Infogauda

Infogauda / Santiago de Compostela

 As cifras de peregrinos rexistradas ao longo do ano 2015 volven demostrar que o Camiño de Santiago está en auxe e plena actualidade. O número de camiñantes que recolleron a Compostela no 2015 chegou aos 262.515, o que supón 24.532 máis que no ano 2014. Isto implica un incremento do 10,31% con respecto aos peregrinos que acudiron á Oficina do peregrino no ano 2014.  

 En relación aos mercados, os peregrinos estranxeiros supuxeron o 53,38% do total. Concretamente contabilizáronse 140.138 peregrinos internacionais na oficina de Santiago de Compostela, mentres que os españois supuxeron o 46,62%, con 122.377 camiñantes rexistrados. 

 As procedencias foron moi diversas, contabilizándose 178 países de orixe distintos, 39 máis que en 2014, o que mostra a gran capacidade do Camiño para atraer visitantes de todo o mundo. Despois de España, o país do que procederon mais peregrinos no ano 2015 foi Italia, sobrepasando a cifra dos 22 mil peregrinos.  

 Deste xeito, por segundo ano consecutivo, os peregrinos italianos superaron aos procedentes de Alemaña, que nos últimos anos era o país do que acudían mais peregrinos estranxeiros. 

 Tras Italia e Alemaña, o ránking dos 10 principais países emisores de peregrinos estranxeiros continúa con Estados Unidos, Portugal, Francia, Reino Unido, Irlanda, Canadá, Corea e Brasil.  

 Tamén ocupan postos relevantes países como Australia que se sitúa no posto duodécimo, Bélxica, que está na decimosexta posición, ou Xapón, que é o vixésimo.  

O Camiño Francés continúa sendo o máis demandado 

 No relativo aos camiños, a ruta que segue sendo a mais demandada é o Camiño Francés. En total 172.244 peregrinos realizaron esta Ruta representando o 65,61% do total dos peregrinos que chegaron a Santiago.  

 Tras o Camiño Francés, o Camiño máis transitado foi o Portugués con 43.149 peregrinos, o que representa o 16,44% do total. A estas dúas rutas séguenlle o Camiño do Norte que ten un peso sobre o total do 6,05%, e 15.873 peregrinos, o Camiño Primitivo co 4,35% do total e 11.428 peregrinos, o Camiño Inglés, co 3,52% do total e 9.247 peregrinos e o Camiño do Sudeste, co 3,51% do total e 9.221 peregrinos.  

Máis de 379 mil viaxeiros aloxados no Camiño Francés  

 En canto aos viaxeiros aloxados nos establecementos hoteleiros dos concellos polos que transcorre o Camiño Francés, nos once primeiros meses do ano foron 379.022, un 12,9% máis que no mesmo período do pasado ano.  

 Os viaxeiros estranxeiros supuxeron o 53% do total de aloxados, e experimentaron unha suba do 13,3%, o que supón un crecemento case un punto porcentual superior ao experimentado polos viaxeiros nacionais, que se incrementaron nun 12,4%.  

 O número de noites rexistradas nestes establecementos do Camiño Francés superaron as 400.000, o que supuxo un aumento do 13,2% con respecto ao mesmo período de 2014.