A GUARDA

PATRIMONIO

Agentes erosivos nas muralhas de Sta. Cruz

Muralhas da Fortaleza de Santa Cruz (A Guarda)

Foto: Infogauda

José Buiza Badás

 Os agentes físicos, químicos e biológicos atuarom desde o mesmo momento em que se levantavam uns muros de pedra irregular aparelhada a enformar um amontoado de cascotes, pedra seca e terra. As capilaridades aparecerom cedo, de maneira a concretizar problemas derivados da ascensom da água na pedra. Isso, unido às diferenças de temperatura día-noite, provocando termoclastias, à descompressom geradora de dilataçons e  gretas, à menos provável gelifraçom pola rotura da pedra mercé da açom dos cristais de gelo ou às haloclastias derivadas da incrustaçom do sal e do seu aumento de tamanho e pressom, farám com que essa erosom realice o seu trabalho.

 Também, o vapor de água, oxigénio e dióxido de carbono figerom o seu  papel. Podemos apreciar com clareza os efeitos oxidantes naquelas peças miúdas e graúdas de xistos, de piçarras, nalguns pontos do Castelo. Caracterizam-se pola côr avermelhada e parda dos veteados, polas exfoliaçons que lembram para já os  cutelos e navalhas tomados polo óxido. Igualmente, combinados o dióxido de carbono com água convertem-se num ácido carbónico com evidentes faculdades erosivas. De igual maneira, a hidrataçom constante aumenta o volume de determinados minerais, sendo que a meteorizaçom bioquímica também se fará notar, decorrente da descomposiçom de materiais biológicos no chán.

 Raízes de plantas e de árvores nom derom nunca tréguas na fortaleza de Sta. Cruz. O feito delas formarem parte quase que fundamental no recheio empléctico, colmatado pola alvenaria irregular de rípios em toda a volta das muralhas, determina especiais cuidados a implementar no futuro. Líquens vários, camadas vegetais fortemente aderidas, umha flora diminuta em tudo quanto é sítio e as sempre presentes mimosas e acácias, agocham o carácter pétreo e rotundo de umha obra específica militar. Boa prova disto está nessas contramuralhas disfarçadas de verdura e total humidade, designadamente aquela condizente com a cortina do Tecla, onde a insolaçom demora a chegar já de manhâ, evidenciando-se argamassas nom compactas junto de tramos onde houbo necessidade de aplicar umha cimentaçom que afixasse esse comprimento todo. Nom admira que as escadas em cantilever,  sem zancos,  fossem nos acessos autênticos imbornais em días de chuva.

 Formigas, ratos, topeiras, minhocas, etc., protagonizam um universo animal miniaturizado que tem estatuto próprio fora e dentro do forro murário, formando parte da meteorizaçom chamada externa.

 Os granitos apresentam alteraçons consistentes na corrosom das suas superfícies, grans que podem ser raspados, presença de argilas nos feldspatos, de “espelhos” a se dissociarem do bloco. Quem menos sofre com estas açons serám os quartzos, presentes também en Sta. Cruz.