GALICIA

Cultura e Educación continuará facilitando o acceso do alumnado aos libros de texto, con clara prioridade para as familias con menos ingresos 

A introdución do libro dixital, a implantación do Fondo Solidario de Libros de Texto e as axudas para a adquisición de libros de texto dan orixe a un formato novo e complementario de Gratuidade Solidaria 

A Consellería promove a unión de recursos da Comunidade escolar, no marco dun novo modelo de acceso. Para iso, reuniuse coas ANPAs e enviou unhas instrucións informativas aos centros

Infogauda / Galicia

 A Consellería de Cultura, Educación e Ordenación Universitaria publicou onte día 1 de xuño, no Diario Oficial de Galicia as ordes polas que se regulan tanto as axudas á adquisición de libros de texto como o funcionamento do novo fondo solidario de libros, dous instrumentos complementarios que permitirán ás familas ou ben adquirir os libros de texto (1º, 2º, 4º e 6º de educación primaria, 1º e 3º de educación secundaria obrigatoria e educación especial) ou utilizar os dispoñibles nos Fondos que se constituen nos centros (3º e 5º de educación primaria e 2º e 4º de educación secundaria obrigatoria), garantindo que as familias con rendas máis baixas sexan as primeiras beneficiarias.

A combinación dos diferentes programas postos en marcha pola consellería nos últimos anos (axuda para adquisición, reutilización de material existente, acceso progresivo a contidos educativos dixitais e a plataformas de aprendizaxe dixital) permite aproveitar o mellor de cada un dos instrumentos utilizados, obtendo o máximo rendemento educativo, así como un importante nivel de cobertura en canto ao alumnado beneficiario.

 Convocatoria de axudas  No vindeiro curso 2015/2016 as axudas á adquisición de libros dirixiranse ás familias do alumnado matriculado en 1º e 2º de educación primaria –cursos nos que as características do seu uso limita ou exclúe a súa reutilización-, 4º e 6º de primaria e de 1º e 3º de ESO, vinculado, neste caso, ao calendario de implantación da LOMCE.  

 Os termos da convocatoria, así como os prazos e requisitos poden consultarse no DOG do día 1 de xuño.