VAL MIÑOR

GUILLERME AFIRMA EN GONDOMAR QUE “VOTAR BNG É APOSTAR POR VIVIR E TRABALLAR EN GALIZA CON DIGNIDADE”

Aymerich defende que “a única vía segura para cambiar as políticas de recortes é votar BNG”

                                      

Infogauda / Val Miñor

O portavoz nacional do BNG, Guillerme Vázquez, asegurou esta tarde en Gondomar que “votar BNG o día 21 é apostar pola esperanza, polo dereito a vivir e traballar en Galiza con dignidade”.

O portavoz nacional participou nunha charla-coloquio na que tamén interviñeron, entre outras, a candidata do BNG pola comarca, Marta Dacosa, e o cabeza de lista por Pontevedra, Carlos Aymerich.

Durante a súa intervención, Guillerme Vázquez afirmou que “o día 21 hai dúas alternativas, ou apostar por Feijóo, por máis do mesmo, que coas súas políticas nos leva ao desastre económico e a que a maioría da sociedade se empobreza, ou apostar polo BNG, que é o voto da esperanza, do dereito humano a vivir e traballar en Galiza con dignidade”.

“Precisamos un goberno na Xunta que defenda a Galiza e á súa xente e ese goberno só pode vir da man do BNG”, subliñou

Pola súa parte, o cabeza de lista BNG por Pontevedra, Carlos Aymerich, defendeu esta tarde en Gondomar que só hai un camiño para botar ao PP da Xunta e mudar as políticas de recortes, “depositando a confianza no Bloque Nacionalista Galego o vindeiro 21 de outubro”. Nesta liña asegurou que o BNG “nunca favorecerá os recortes, como fan outras forzas políticas en Andalucía ou Estremadura”.

Carlos Aymerich subliñou que é posible desenvolver unha política diferente á que está levando a cabo Feijoo na Xunta, que non supoña un ataque directo ao peto dos cidadáns e cidadás. “O PP di que non vai cambiar nada, porque non quere que cambie nada, pero si son posibles outras políticas”, manifestou, ao tempo que subliñou que para acadar este reto “cómpre superar o desencanto que propicia o propio Partido Popular”.

O candidato considerou que as propias enquisas indican que a gran maioría dos galegos e galegas queren que o PP deixe de gobernar en Galiza, polo que salientou que o reto do BNG é “convertir esa maioría social nunha maioría nas urnas o 21 de outubro”.