O ROSAL

O BNG do Rosal congratúlase de que a convocatoria de eleccións fixera que se reiniciaran as obras de mellora da estrada do Morán e rotonda de Couselo

Infogauda / O Rosal

O BNG do Rosal mostra a súa satisfacción polo reinicio das obras de mellora da estrada do Morán e a rotonda de Couselo, despois dunha longa espera.

                                          

Segundo o voceiro nacionalista, Alberte Alonso Pereira, “despois dun parón de preto dun ano, durante o cal a veciñanza tivo que transitar por unha estrada en obras cun aspecto de absoluto abandono, os traballos reiniciáronse o pasado dia 11 de setembro, coincidindo sospeitosamente coa convocatoria de eleccións ao Parlamento de Galiza. O que non consegue facerse co tempo, conségueo a convocatoria dunas eleccións”, afirmou.

Dende o BNG indican que non é algo que sorprenda. É unha práctica á que os sucesivos gobernos do PP nos teñen afeitos. O comezo desta mesma obra fíxose coincidir coa convocatoria das últimas eleccións municipais. Daquela xa pasaran varios anos dende que o Pleno do Concello, aprobara por unanimidade a proposta do BNG de facer melloras para paliar a perigosidade do cruce de Couselo.

Engaden os nacionalistas que dende a súbita paralización, a estrada permaneceu nunhas condicións que produciron, durante aproximadamente un ano, continuas molestias. Asemade puxeron en risco a seguridade dos que por alí transitaban.  Pedras na calzada, ferros con sinais que, abandonados e ás veces deteriorados,  puxeron en perigo a circulación.

Os nacionalistas pregúntase por que non se reiniciaron antes e indican que, dende o seu punto de vista, queda claro que para o alcalde os intereses do partido están por riba dos intereses dos veciños do Rosal. Soamente cabe esperar non ter que esperar ás seguintes eleccións municipais para velas rematadas, conclúen.