PONTEVEDRA

BEGOÑA ESTÉVEZ REUNIUSE CON REPRESENTANTES DO ALONDRAS, O BALONMÁN CANGAS, O ATLÉTICO GUARDÉS E A FEDERACIÓN GALEGA DE ATLETISMO

Deputación concedeulles axudas para a organización ou participación en determinados eventos deportivos

A deputada provincial Begoña Estévez reuniuse ao longo desta mañá con representantes de diversos clubs deportivos e co presidente da federación Galega de Atletismo aos que a Deputación lles concedeu diversas axudas vén para participar en eventos deportivos ou para a organización dalgunha actividade.

A primeira das xuntanzas tivo lugar no concello de Cangas, onde se reuniu co alcalde desta localidade e cos representantes dos clubes CB Cangas e Alondras CF, cos que tivo ocasión de analizar a súa marcha e felicitalos pola boa tempada que están realizando e que no caso do balonmán Cangas lle supuxo o ascenso á Liga Asobal, mentres que o Alondras non puido acceder á 2ª B de fútbol.

A Deputación Provincial concedeu cadansúa axuda de 9.000 euros a ambos os dous clubs para poder desprazarse e participar nos partidos nos que se xogaban o ascenso.

Atlético Guardés

Tamén o Club de Balonmán Feminino Mecalia Atlético Guardés recibiu o apoio da Deputación Provincial, que lle concedeu unha axuda de 3.000 euros para poder disputar o partido que lle valeu o ascenso á división de honor do balonmán. A resolución pola que se concede esta axuda foille entregada este mediodía pola deputada Begoña Estévez á presidenta do club, Esperanza Iglesias.

A deputada aproveitou a ocasión para abordar con ela a situación do club e as súas perspectivas de cara ao futuro, ademais de felicitala polo seu ascenso.

Federación Galega de Atletismo

Por outra banda, Begoña Estévez reuniuse no seu despacho co presidente da Federación Galega de Atletismo, Isidoro Hornillos, a quen lle fixo entrega dunha colaboración económica de 5.000 euros para a organización dun evento deportivo.