PONTEVEDRA

O XURADO DO CERTAME “NOVOS VALORES 2011” REÚNESE PARA COMEZAR AS DELIBERACIÓNS SOBRE PRETO DE 300 OBRAS PRESENTADAS NESTA NOVA EDICIÓN

O Xurado Seleccionador do Certame “Novos Valores 2011”, mantivo hoxe a primeira reunión para comezar as deliberacións acerca das case 253 obras presentadas a concurso nesta nova edición. O xurado nesta ocasión está composto por: José Juan Durán, vicepresidente e presidente da Comisión Informativa de Cultura; Carlos Valle, director do Museo de Pontevedra; Carlos Rosón, presidente da Fundación Rosón Arte Contemporáneo (RAC); Carlos García, presidente da Fundación Laxeiro; Antón Sobral, artista de renome; e Ramón Rozas, crítico de arte.

Das 253 creacións presentadas a concurso, 76 pertencen á modalidade de pintura, 50 á de escultura, 40 son fotografías, hai 10 gravados, 32 debuxos, 34 vídeos, 6 deseños e 5 obras catalogadas na seccións de “varios”. Do número total de traballos, 40 deles serán seleccionados en vindeiras reunións para seren expostos e tan só 6 serán os gañadores do Certame “Novos Valores 2011”.

Novos Valores, un dos certames máis sobranceiros dos organizados polo Museo de Pontevedra xunto coa Bienal de Arte e os Premios á Investigación, está orientado a todos os artistas –pintores, escultores, debuxantes, deseñadores, gravadores, fotógrafos, ceramistas ou videocreadores– susceptibles de ser considerados novos valores, naturais ou residentes en Galicia.